Edhe kjo rrugë është e blokuar në Gjilan, por askush nuk e mirëmban

Gjilan – Rruga Pograxhë – Stublinë e cila ka kushtuar mbi 1 milion euro nuk mirëmbahet nga askush pavarësisht se Komuna e Gjilanit ndanë mijëra euro për mirëmbajtje verore e dimërore. Vërshimet e fundit e kanë dëmtuar tej mase rrugën nga shembja e dheut dhe gurëve.

Rruga Pograxhë – Stublinë e cila frekuentohet bukur shumë nga fshatrat e Kosovës Lindore dhe vet banorët e Stublinës gati është bërë e pakalueshme nga shembja e gurëve dhe dheut, raporton rajonipress.

Ka vite që kjo rrugë nuk mirëmbahet pavarësisht se komuna ndanë mijëra euro për mirëmbajtjen verore dhe dimërore.

Zymer Osmani banor i Stublinës thotë për rajonipress se shpesh ata detyrohen që me vetëorganizim ta hapin rrugën, por vërshimet e fundit e kanë dëmtuar shumë dhe duhet teknikë për të eliminuar gurët nga rruga. “Në këtë rrugë janë investuar mbi 1 milion euro dhe është turp që të shkatërrohet në këtë mënyrë” shprehet Osmani.

Kurse Sokol Haziri drejtor i shërbimeve publike tha për rajonipress se kjo rrugë është në kuadër të Komunës së Gjilanit dhe qysh të hënën pas konstatimit të gjendjes meqë nuk kemi asnjë raportim për bllokim rruge, do të marrim masat për ta pastruar sepse është përgjegjësi e jona tha shkurt Haziri./rajonipress/