Nuk bënë t`i lejojmë qentë të na i hanë fëmijët

Nga Sinan Sadiku – Përveç shumë problemeve të tjera Kosovën me vite po e përcjell edhe problemi i qenve endacak, rreziku nga të cilët po vjen duke u rritur nga viti në vit. Kjo për faktin se askush nga institucionet nuk është marrë siç duhet me zgjidhjen e këtij problemi. Shteti i jonë e ka miratuar një ligj që i mbron qentë endacak, por nuk është bërë asgjë që njerëzit, e veçmas fëmijët të mbrohen prej atyre qenve.

Andaj po ndodhin raste të tmerrshme që të rrëqethin, kur fëmijët janë viktimë e qenve. A ka ma keq, a ka ma tmerr se qentë t`ia marrin jetën një fëmije me metoda të tmerrshme siç dinë ta bëjnë vetëm qentë. Sa e dhimbshme është kjo. A ka ndonjë njeri i cili nuk tmerrohet kur dëgjon për raste të tilla!?

Tani numri i qenve në Kosovë është shumë i madh , si pasojë e asaj se nuk ka pas as strategji, as plan konkret për menaxhimin e këtyre kafshëve që dinë të jenë shumë të rrezikshme, edhe vdekjeprurëse. Kosova, tani nuk ka kapacitete të përballet dhe ta menaxhoj këtë gjendje në përputhje me ligjin që e ka miratuar parlamenti i saj. Të paktën kështu do të jetë situata për disa vite. Por nëse nuk ndërmerret diçka konkrete në këtë fushë ka rrezik të madh që të shtohet numri i viktimave.

E viktima nuk janë vetëm fëmijët e vdekur, por janë edhe fëmijët që janë sulmuar nga qentë, edhe ata që frikohen për çdo ditë, kur i takojnë qentë duke shkuar në shkollë e gjetiu. Janë edhe familjet e tyre, nënat e tyre të cilat janë në ankth se mos po u ngjan fëmijëve të vet më e keqja. Pra situata është urgjente, kërkon veprime të ngutshme, nuk pret. Kanë të drejta qentë, por kanë të drejta edhe fëmijët. Në Kosovë bëhet shumë zhurmë për të drejtat e njeriut, për të drejtat e fëmijëve. Kryesisht zhurma ka karakter retorik dhe jo veprues.

Tani janë duke u shkel në mënyrën më drastike të drejtat e fëmijëve të cilët nuk gëzojnë kurrfarë sigurie se nuk do të sulmohen dhe të masakrohen nga qentë. Deri tani një numër i madh i fëmijëve madje edhe i burrave e kanë pësuar nga qentë. Disa janë frikësuar, disa frikësohen çdo ditë dhe i nënshtrohen rrezikut që të viktimizohen, disa kanë mbet me pasoja nga tmerret e përjetuara , e disa tani nuk janë më sepse e kanë pësuar më së rëndi, duke i privuar nga e drejta për jetë të cilën të drejtë duhet t`ua garantoj shteti.

Në këtë gjendje në të cilën është Kosova, kur 20% e popullatës së saj është në varfëri ekstreme, dhe kanë vështirësi të patejkalueshme për t`i plotësuar nevojat më elementare, kur nuk e kanë të zgjidhur problemin banimit, kur të rinjtë nuk martohen sepse nuk kanë mundësi materiale të krijojnë familje, kur për çdo ditë njerëzit ikin nga Kosova, duke e rrezikuar edhe jetën dhe atë pak pasuri që e kanë, ndarja e disa milionave euro për përkujdesje ndaj qenve do të ishte çmenduri. Në këtë situatë ose duhet t`i vrasim qentë, ose t`i lëmë të na i hanë fëmijët .

Mendoj që pasi puna ka ardhur deri këtu ku është, e nuk do të duhej të vinte, përkundër asaj se edhe qentë janë qenie të gjalla që meritojnë trajtim human , nuk ka zgjidhje tjetër përveçse të vriten një numër i madh i tyre në një aksion të shpejtë dhe të koordinuar në tërë Kosovën.

Më pas shpejt të bëhet projekti dhe ai numër i vogël që ka mbetur të menaxhohen në mënyrë që të mos lejohet shumimi i tyre, që të krijohen vende të veçanta për izolimin e tyre dhe që të mos paraqesin rrezik për njerëzit. Për kushtet që i ka Kosova një numër i tillë i qenve paraqet rrezik thuajse po aq të madh sa paraqet rrezik për ndonjë vend të zhvilluar ta zëmë sëmundja ngjitës e shpezëve, ose lopëve. Ne e dimë që në raste të tilla kafshët apo shpezët asgjësohen masivisht.

Kosova nuk guxon që në çdo fushë t`i përfill lloj lloj organizatash që merren me mbrojtjen e qenve, ose me çështje të tjera. Kosova në radhë të parë duhet t`i mbroj qytetarët e vet, njerëzit e vet, siç vepron çdo shtet në botë, edhe në rastet kur ia prish qefin ndonjë organizate. Kuptohet pasi Kosova nuk ka mjete ta zgjidh problemin e qenve ndryshe, pa i asgjësuar , ajo duhet t`u drejtohet organizatave të cilat u dalin në mbrojtje qenve që nëse kanë mundësi dhe mjete, ato ta zgjidhin këtë çështje ashtu siç është më së miri. Nëse jo t`u tregohet se nuk kemi mundësi t`i lejojmë qentë të na i hanë fëmijët ose njerëzit e tjerë dhe të veprohet.

Kosova ka shumë, tepër shumë prioritete të cilat kanë të bëjnë me plotësimin e nevojave elementare për njerëzit, me mbrojtjen e të drejtave njerëzore, me mbrojtjen e fëmijëve dhe të drejtave të tyre, të cilat prioritete nuk i japin mundësi të merret dhe të harxhoj mjete e energji të shumta me të drejtat e qenve. Është e tepërt, e besa edhe absurde zhurma e institucioneve dhe organizatave që merren me mbrojtjen e të drejtave të fëmijëve në rastet kur është cenuar ndonjë e drejtë e cila nuk e ka dëmtuar dhe aq fëmijën, ndërsa nuk kemi thuajse fare reagime, ose ato reagime janë anemike në rastet kur fëmijët vdesin ose traumatizohen nga kafshimi qenve./rajonipress/