Kosovës i mbetet ta rrëzojë “murin” e Schengenit

Duke rikujtuar 25 vjetorin e rrëzimit të Murit të Berlinit, kryeministri në detyrë, Hashim Thaçi, në një postim në Facebook, ka thënë se Kosovës i mbetet ta rrëzojë “murin” e Schengenit nëpërmjet liberalizimit të vizave.

Thaçi ka thënë se rrëzimi i Murit të Berlinit ishte simbol i ndarjes së kontinentit europian dhe sundimit të komunizmit në gjysmën lindore të tij.

Lexojeni të plotë postimin e Thaçit në Facebook

“Si sot 25 vite më parë u rrëzua muri famëkeq i Berlinit i cili ishte simbol i ndarjes së kontinentit europian dhe sundimit të komunizmit në gjysmën lindore të tij. Kjo ngjarje emblematike shënoi tatëpjetën e totalitarizmit komunist, i dha fund Luftës së Ftohtë dhe nisi përhapjen dhe konsolidimin e lirisë, demokracisë dhe ekonomisë së tregut anembanë botës duke përfshirë në një kohë të dytë edhe Kosovën.

Megjithatë për ne ngelet ende një mbeturinë e padukshme e atij muri të dikurshëm për të rrëzuar, bëhet fjalë për ‘murin’ e shengenit që ne presim ta eliminojmë sa më shpejtë nëpërmjet procesit të liberalizimit të vizave. HTH” (sic), ka shkruar Thaçi. /Telegrafi/