Milionerët e drejtësisë nuk ka kush t’i hetojë

Pasurimi i dyfishtë, dukuri e theksuar në Gjykata e Prokurori. Antikorrupsioni pranon se nuk e vërteton dot prejardhjen e pasurisë

Pasuria e zyrtarëve të korruptuar të drejtësisë dhe të pasuruar në mënyrë të paligjshme nuk hetohet nga askush. Pushteti ka mundësuar bllokimin e ligjit që do t’i detyronte të gjithë ta zbardhin origjinën e pasurisë dhe nëse nuk kanë argumente të qëndrueshme të përballen me konfiskim

Mënyra se si janë pasuruar shumë zyrtarë të lartë të shtetit mbetet një mister për publikun. Si rrjedhojë e mungesës së Ligjit për hetimin e prejardhjes së pasurisë së pashpjegueshme dhe konfiskimin e saj, një ligj i cili ka kohë që shtetit të Kosovës po i kërkohet edhe nga BE-ja, tanimë edhe individë të shumtë me të kaluar të dyshimtë janë instaluar në sistemin e drejtësisë së Kosovës dhe vazhdojnë ta përdorin atë edhe për pasurimin e tyre të shpejtë. Shumë njerëz që punojnë në këtë sistem, e të cilët me rroga mesatare mezi mund t’ia dalin për një jetesë mesatare, janë bërë edhe me disa hektarë tokë dhe vila milionëshe, derisa kontrolli-hetimi dhe zbardhja e prejardhjes së pasurisë së tyre nga institucionet përkatëse akoma mbetet një mision i pamundur.

Drejtori i Agjencisë Kundër Korrupsionit i ka thënë gazetës se në bazë të legjislacionit në fuqi është bërë një punë voluminoze në krahasimin dhe verifikimin e të dhënave për pasurinë e deklaruar, për zyrtarët e obliguar me ligj në të gjitha instancat e shtetit, por për më shumë hetime të prejardhjes së saj Kosova akoma nuk e ka ndërtuar një legjislacion adekuat. “Nuk janë të pakta rastet që Agjencia i dërgon në prokurori e i përkasin deklarimit të rrejshëm. Problemi më i madh është vërtetimi i prejardhjes së pasurisë. Pikërisht për këtë mungon baza juridike. Me Ligjin për Deklarimin e Pasurisë kjo nuk është rregulluar, kurse ligji i veçantë, edhe pse është premtuar disa herë, ende nuk është bërë”, tha Hasan Preteni për “Kosova Sot”.