Populli në këmbë për rrëzimin e Qeverisë së dështuar

Mobilizimi qytetar kundër së keqes. Protesta cilësohet si një referendum popullor.

Njohësit e situatës politike pohojnë se kjo qeveri i ka ditët e numëruara, për shkak të vazhdimit të humbjes së jashtëzakonshme të besimit, sikur që u pa edhe në protestën e fundit, në të cilën morëm pjesë më se 100 mijë qytetarë

Duke vlerësuar masivitetin e pjesëmarrjes shumë të madhe të qytetarëve në protestën e 17 shkurtit, të ftuar nga subjektet politike opozitare dhe shoqëria civile, të cilët kërkuan dorëheqjen e Qeverisë së Kosovës dhe shpalljen e zgjedhjeve të reja të jashtëzakonshme, analistët politikë theksojnë që kjo protestë ishte si një lloj referendumi i madh popullor kundër Qeverisë shkelëse të Kushtetutës.

Sipas analistëve, Qeveria është në panik nga frika që i vjen nga të bëmat e saj shumë frikësuese kundër vendit dhe qytetarëve.

Ekziston dhe vlerësimi se dyshja Thaçi-Mustafa duhet të ndiqen edhe penalisht dhe të burgosen. Profesori i së drejtës, Muhamet Kelmendi, tha për Kosova sot se legjitimiteti politiko-juridik ndaj qeverisë nuk ekziston që nga koha e nënshkrimit të marrëveshjeve antikushtetuese, prandaj këtë duhet ta kuptojë sa më shpejt Qeveria dhe drejtuesit e saj, partnerët e koalicionit qeverisës, Thaçi e Mustafa. “Vetë fakti se Asociacioni i Komunave Me Shumicë Serbe në Kosovë është në disproporcion me 23 nene të Kushtetutës së Kosovës, juridikisht e bën Qeverinë jolegjitime në kuptimin ligjor. Kjo jo në kuptimin e numrave në Kuvendin e Kosovës, por në kuptimin kushtetues, kuptim që e bën jolegjitime Qeverinë dhe e ngarkon me përgjegjësi penale për shkak të veprës penale nga nenet 123 dhe 125 të Kodit Penal të Kosovës. Jolegjitimiteti del gjithashtu edhe nga manifestimet e qytetarëve të Kosovës”, tha Kelmendi për “Kosova Sot”..