Ministrat e Mustafës, në vallen e krimit me PDK-në

Pasojat ekonomike të qeverisjes së keqe. Qeveria e mashtroi popullin me zotimet kundër monopoleve

Ekspertë dhe deputetë nga opozita thonë se Prokuroria duhet që të hetojë rrjetin kriminal të Qeverisë me oligarkët, që ngulfat bizneset e ligjshme, sepse janë ministrat përgjegjës dhe fajtorë që po i tolerojnë oligarkët të shkatërrojnë ekonominë e Kosovës, duke i mbajtur ata mbi ligjin

Para më shumë se një viti, kur erdhi në krye të Qeverisë së Kosovës, me gjithë premtimet që kishte bërë se ndër prioritetet e ekzekutivit që ai e drejton do të jetë lufta ndaj kompanive që kanë krijuar monopole në tregun e Kosovës, veç deklaratave mediale deri sot nuk pati ndonjë veprim konkret nga Qeveria e Isa Mustafës.

Tri ministritë që drejtohen nga ministrat e LDK-së, në MTI, Ministrinë e Infrastrukturës dhe Financave, ku hyjnë Dogana dhe ATKja, vazhdojnë të heshtin rreth çështjes së monopoleve. Njohës të kësaj fushe thonë se kjo ndodh për shkak se bizneset monopoliste të udhëhequra nga oligarkët e qeverisë këtë po e arrijnë në saje të korrupsionit që i lidh oligarkët me pushtetarët.

Sipas analistëve, nuk është në interesin e pushtetarëve që të bëjnë publike edhe për opinionin publik identifikimin e bizneseve monopoliste, sepse tyre qëndrojnë vetë mafiozët e politikës dhe pa ndihmën e tyre këto biznese nuk do të kishin asnjë gjasë që të krijojnë monopol në ekonominë e Kosovës./kosova sot/