Komiteti i Arsimit e vlerëson të dobishme vizitën e delegacionit të arsimit në Turqi

Gjilan – Komiteti i Arsimit (KA) e ka vlerësuar të suksesshme vizitën e delegacionit komunal në Bursa të Turqisë, e cila shumë shpejt do të konkretizohet me përfitime konkrete për shkollat e Komunës së Gjilanit.

Arben Mehmeti, kryesues i KA, ka thënë se vizita të këtilla janë bërë edhe në qeverisjen e kaluar, por ato nuk kanë sjellë këso rezultate, prandaj e ka lavdëruar delegacionin e Drejtorisë Komunale të Arsimit që ka arritur të krijojë raporte të mira me donatorët turq.
Nazmi Musa, drejtor i Arsimit, ka prezantuar një informatë të hollësishme për këtë vizitë si dhe për vizitën kthyese të delegacionit turk, të dyja të realizuar në këtë vit, e para në shtator dhe e dyta në nëntor.

Nga ky bashkëpunim, Gjilani do të ketë disa përfitime konkrete, ka thënë Musa, duke nënvizuar se kompania “Er Metal” si dhe qendra e bizneseve “Budgen” e pronarit me origjinë shqiptare Fahretin Gylener, janë shprehur të gatshme t`i pranojë 20 nxënës nga Gjilani në kurset për aftësim profesional, që zgjasin disa muaj dhe që njihen si kualifikime zyrtare në shtetet e BE-së.

Drejtori i Arsimit, Veli Serikaya, shkollave të binjakëzuar në Gjilan u ka dhuruar nga një lap-top me projektor, ndërkohë që ka kremtuar edhe nga një tabelë të mençur. Gjithashtu ai ka premtuar se për të gjitha shkollat në komunën e Gjilanit do të sigurojë nga një projektor, me qëllim që të rritet cilësia e mësimdhënies, përmes përdorimit të mjeteve teknologjike. Këto pajisje, do të transportohen falas në Kosovë, nëpërmjet KFOR-it turk, ka thënë Musa.

Edhe Ajtene Shahiqi (AAK), si pjesë e këtij delegacioni, ka thënë se nxënësit e komunës së Gjilanit do të jenë përfituesit më të mëdhenj nga ky bashkëpunim i mirë me regjionin Bursa të Turqisë.

Opozita pati vërejtje te përbërja e delegacionit. Fehmi Sylejmani (VV) ka thënë se është dashur të përfshihen sa më shumë mësimdhënës, sepse ata do të kishin pasur mundësi që përvojat e atjeshme t`i zbatonin në shkollat e këtushme.

Kurse Leonora Bunajku (PDK) tha se vizita të tilla ka pasur edhe në të kaluarën, por përfaqësimi pozitë-opozitë në delegacion ka qenë i barabartë, ndërsa tani nuk është vepruar njësoj./rajonipress/