Kusht i dialogut

Gjurmët e luftës në Kosovë vazhdojnë të mbesin të freskëta derisa nuk mbyllet plaga e të pagjeturve, e cila për 16 vjet me radhë po instrumentalizohet nga politika.

Derisa Qeveria e Kosovës nuk është treguar e “zonja” që çështjen e 1650 personave të zhdukur ta vënë si temë bazë në tavolinën e bisedimeve në Bruksel, Qeveria e Serbisë po bën politikë me të pagjeturit kosovarë.

Partitë opozitare në Kosovë thonë Qeveria e Serbisë e di saktë se ku janë kosovarët e zhdukur, por vazhdimisht po mundohet ta minimizojë çështjen, deri në zhdukjen e gjurmëve të krimit.

Madje, sipas tyre, kjo temë nuk dialogohet, por duhet të jetë kusht i dialogut. Ata madje kujtojnë faktin se Serbia obligohet nga organizatat ndërkombëtare për të ndihmuar në zbardhjen e fatit të të pagjeturve.

Për më tepër, subjektet politike opozitare në Kosovë përgjegjëse për moszbardhjen e fatit të të pagjeturve e bëjnë edhe Qeverinë e Kosovës pasi, sipas tyre, po iu nënshtrohet kërkesave të Qeverisë serbe.

Kryenegociatorja e Kosovës, Edita Tahiri, ka thënë për “Zërin” se Qeveria e Kosovës e ka dorëzuar për herë të dytë dokumentin me listën e temave që kërkon të trajtohen në dialogun e Brukselit e ku ndër temat kryesore, sipas saj, është edhe çështja e të pagjeturve./zeri/