Ahmeti: Dialogu është mjet e asnjëherë qëllim në vetvete

Kryetari i Komunës së Prishtinës, Shpend Ahmeti ka shkruar në llogarinë e tij në Facebook se dialogu është mjet, e asnjëherë qëllim në vetvete, duke shtuar se tek ne dialogu është bërë zëvendësim i zgjidhjes.

“Pra më mirë është të dialogosh pafund edhe kur e din se nuk ka kurrfarë rezultati, se sa të dukesh se po refuzon dialogun”, shkruan Ahmeti, transmeton Koha.net.

Përmirësimi i marrëdhënieve me Serbinë nuk është proporcional me veprimet e Kosovës, sipas Ahmetit, ngaqë Serbia së fundi bëri pritje pothuajse shtetërore , kriminelit të dënuar për krime lufte në Kosovë, e kjo për Ahmetin është një shuplakë për viktimat dhe familjet e tyre në Kosovë.

“Me gjithë vullnetin e mirë te shqiptarëve të Kosovës (jo qeverisë), me qëllimin e përmirësimit te marrëdhënieve me Serbinë (vullnet i paprecedent në raste të ngjashme në botë), Serbia për çdo ditë tregon se nuk është e interesuar të bëjë të njëjtën. Së fundi i bëri pritje gati se shtetërore kriminelit të dënuar të luftës për krime në Kosovë. Veçse edhe një shuplakë për viktimat dhe familjet e tyre”.

Ai u drejtohet qytetarëve duke u thënë se “mos u ndieni keq për qasjen që duhet ndërruar ndaj dialogut. Kemi treguar durim e vullnet të paparë. Mirëpo nënshtrimin nuk duhet pranuar”, sepse sipas Ahmetit, vullneti nuk duhet të keqkuptohet si pranim i pabarazisë.

“Këtë mund ta bëjmë edhe qetë edhe me dinjitet. Këtë duhet kuptuar secila qeveri e secili politikan. Nuk mund të fitojë askush nga nënshtrimi i popullit”, shkruan në fund kryetari i Komunës së Prishtinës, Shpend Ahmeti.

http://koha.net/?id=27&l=87476