Universiteti i Prishtinës, të përgatitet për zgjedhje

Këshilli Drejtues (KD) i Universitetit të Prishtinës “Hasan Prishtina” obligohet nga Qeveria e Kosovës që të hartojë rregulloren për mbajtjen e zgjedhjeve të përgjithshme në këtë Universitet. Ky vendim është marrë të enjten në mbledhjen e Qeverisë. Qeveria ka kërkuar që të zgjidhet edhe Komisioni Qendror i Zgjedhjeve që do të ketë në përbërje katër anëtarë, prej tyre dy profesorë të rregullt.

Ministri i Arsimit, Arsim Bajrami, ka thënë se vendimi i Qeverisë, i datës 24 tetor 2015, e obligonte Ministrinë e Arsimit për përgatitjen e udhëzimit administrativ për të përcaktuar modalitetet e zgjedhjeve të përgjithshme dhe të parakohshme të Universitetit, në harmoni me Ligjin e Arsimit të Lartë dhe Statutin e Universitetit të Prishtinës.

“Pas aprovimit të këtij udhëzimi administrativ, obligohet Këshilli Drejtues si organ kryesor qeverisës i Universitetit që në afat prej 15 ditësh që nga hyrja në fuqi e këtij udhëzimi, të hartojë Rregulloren për Zgjedhje, të përgatisë planin dinamik, kalendarin e zgjedhjeve dhe të zgjedhë Komisionin Qendror të Zgjedhjeve të përbërë nga dy profesorë të rregullt, sekretari i Universitetit dhe një përfaqësues i Ministrisë së Arsimit”, ka thënë ministri.

Komisioni Qendror i Zgjedhjeve, sipas ministrit do të marrë të gjitha kompetencat me organizimin e proceseve zgjedhore. /zeri/