Reagon Matoshi: Nuk jam ofiqar e as bankier, por udhëheqës politikë

Kamenicë – Nuk matet efikasiteti i punës së udhëheqësve politikë me orë qëndrimi në zyre, por me angazhim dhe ide e projekte për zgjidhjen e problemeve të qytetarit. Nënkryetari i komunës nuk është ofiqar apo bankier ku i pret palët për shërbime nga ora 8 në 16 ka shkruar Matoshi si përgjigje ndaj postimit të Begzad Sinanit se nuk i ka gjetur në zyre zyrtarët kryesor komunal.

Prandaj ekziston ndarja mes shërbyesve civil dhe atyre politikë. Udhëheqësit bëjnë politika, gjejnë burime për projekte, ndërsa shërbyesit civil i zbatojnë ato në shërbim të qytetarëve nga ora 8 në 16. “Unë them që koha për të bërë bilance për punën dhe mos punën e secilit fillon që nga momenti i marrjes së përgjegjësive dhe në këtë drejtim besoj që jam angazhuar maksimalisht për t`i ofruar qytetarit të Kamenicës zgjidhje për problemet e shumta ditore. Kam kaluar shumë kohë në Prishtinë, nëpër zyret e qeverisë për të gjetur fonde zhvillimore sepse buxheti i vogël i Kamenicës na pamundëson investime në projekte kapitale” ka shkruar Matoshi.

Matoshi ka thënë se besoj që kemi arritur pak sukses në këtë drejtim, sukses i cili nuk do arrihej duke e respektuar orarin e punës, duke qëndruar në zyre kot. “Unë i di përgjegjësitë e mia, e di dhe e mendoj secilën ditë pse jam në komunë, dhe përfundimisht jam krenar me angazhimin dhe punën e pastër që kam bërë dhe bëj këtu, duke e ditur se asnjëherë nuk është mjaft ajo që bëjmë, për ata që ju shërbejmë, e që janë qytetarët. Në këtë drejtim, unë kërkoj edhe nga kryetari i Komunës angazhim më të madh, presion të vazhdueshëm në qeverinë qendrore sepse qytetarët na kanë votuar për ta zhvilluar Komunën dhe për të përmirësuar jetën e qytetarëve. Dhe përgjegjësinë e dështimit secili e merr aq sa i takon. Janë qytetarët ata që e vlerësojnë punën e të zgjedhurve të tyre dhe kjo do të ndodhë në zgjedhjet e ardhshme” ka shkruar Matoshi si përgjigje ndaj postimit të Begzad Sinanit se nuk i ka gjetur në zyre zyrtarët kryesor komunal./rajonipress/