Projekti i kanalizimit fekal dhe atmosferik në lagjen “Arbëria” në përfundim e sipër

Gjilan – Komuna e Gjilanit, përkatësisht Drejtoria për Shërbime Publike, është duke e finalizuar projektin e kanalizimit fekal dhe atmosferik në lagjen “Arbëria”.

Punimet i ka vizituar sot nënkryetari i Komunës, Rexhep Kadriu, drejtori i Shërbimeve Publike, Naser Korça dhe ai i Prokurimit, Salih Kqiku.

Kadriu u shpreh i kënaqur që po finalizohet ky projekt që është jashtëzakonisht i nevojshëm për qytetarët e lagjes “Arbëria”.

“Ky projekt është vazhdimësi e projekteve në kuadër të katërshes së madhe të prioriteteve infrastrukturore të kryetarit Haziri. Është projekt shumë i nevojshëm për qytetarët e kësaj lagjeje dhe po punohet me cilësi të lartë. Po vazhdojmë të punojmë shumë në përmbushjen e këtyre objektivave, në mënyrë që qytetarët tanë të jetojnë dinjitetshëm”, ka thënë nënkryetari Kadriu.

Ndryshe, projekti i kanalizimit fekal dhe atmosferik ka gjatësi prej 585 metrash me kosto prej 65 mijë euro dhe pritet të përfundoj brenda pak ditësh./rajonipress/