Zjarrfikësit marrin donacion me vlerë mbi 60 mijë euro

Kamenicë – Zjarrfikësi Mentor Krasniqi, me prejardhje nga Kamenica, i cili këtë profesion e ushtron në Gjermani e ka mbajtur premtimin e dhënë muaj më parë Komunës së Kamenicës, për të sjellë pajisje për Brigadën e zjarrfikësve. Në një ceremoni sot në Kamenicë në prezencën e nënkryetarit të Komunës Fatmir Matoshi, u bë dorëzimi i këtyre pajisjeve vlera e të cilave llogaritet të jetë mbi 60.000 euro.

Këto pajisje janë siguruar nga njësitet e zjarrëfikjes të qyteteve Aachen dhe Geilenkirchen dhe përbëjnë rroba për zjarrfikës, dhe të gjitha pajisjet profesionale që janë të nevojshme.

Në një pritje në Komunën e Kamenicës, falënderim i veçantë i `u bë zjarrfikësit Mentor Krasniqi, nga ana e Nënkryetarit të Komunës Fatmir Matoshi.

“Ju keni treguar shembullin më të mirë se si punohet për komunën dhe si duhet të veproj secili qytetarë që e ka mundësinë të ndihmoj komunitetin e vet. Trajnimet që i keni bërë me zjarrfikësit tanë, dhe ndihma që sollët sot janë një garancion më shumë se efikasiteti i zjarrfikësve tanë do të rritet në vazhdimësi. E falënderoj edhe komandantin e Njësisë së Zjarrfikësve Riza Bunjakun dhe drejtorin Faik Rexhepaj për angazhimin e tyre që të bëhet transportimi i këtyre pajisjeve me vlerë nga Gjermania në Kamenicë.”

Mentor Krasniqi, është shprehur i lumtur që me bashkëpunimin me komunën dhe zjarrfikësit e Kamenicës ka arritur të realizoj me sukses idenë e tij, për të sjellë këto pajisje në Kamenicë. “Unë e kam bërë detyrën time dhe jam i lumtur për këtë që po ndodh sot këtu” tha Mentor Krasniqi.

Në emër të Komunës së Kamenicës, dhe kryetarit Begzad Sinani, nënkryetari Matoshi u ka përcjellë mirënjohje njësive të zjarrfikësve të qyteteve Aachen dhe Geilenkirchen./rajonipress/