Prokuroria në Gjilan ndalon disa persona të dyshuar, parashtron kërkesa për paraburgim dhe ngrit tetë aktakuza
Gjilan – Prokuroria Themelore në Gjilan ka ndërmarrë një sërë veprimesh penale gjatë datave 17 dhe 18 nëntor 2026, duke përfshirë ndalimin e disa personave të dyshuar për vepra të ndryshme penale, parashtrimin e kërkesave për caktimin e paraburgimit, si dhe ngritjen e tetë aktakuzave ndaj tetë personave.
Sipas njoftimit të Prokurorisë, më 17 nëntor 2026, me urdhër të prokurorit kujdestar, janë ndaluar tre persona të dyshuar për veprën penale “Sulmi seksual”, nga neni 229 i Kodit Penal të Republikës së Kosovës.
Po ashtu, në kuadër të veprimeve hetimore janë ndaluar edhe katër persona të dyshuar për veprën penale “Dhuna në familje”, nga neni 248 i Kodit Penal, si dhe një person tjetër nën dyshimin për kryerjen e veprës penale “Vjedhja e rëndë”, nga neni 315 i të njëjtit kod.
Në kuadër të këtyre procedurave, Prokuroria Themelore në Gjilan ka parashtruar edhe dy kërkesa për caktimin e masës së paraburgimit ndaj dy personave të dyshuar për veprën penale “Dhuna në familje”.
Ndërkaq, aktiviteti i Prokurorisë ka vazhduar edhe më 18 nëntor 2026, kur janë ngritur gjithsej tetë aktakuza ndaj tetë personave për vepra të ndryshme penale.
Nga numri i përgjithshëm i aktakuzave, katër janë ngritur për veprën penale “Posedimi i paautorizuar i narkotikëve, substancave psikotrope ose analoge”, dy për veprën penale “Lëndimi i lehtë trupor”, një për “Vjedhje pylli” dhe një tjetër për veprën penale “Dhuna në familje”.
Këto veprime përfshijnë çështje të ndryshme penale që lidhen me sigurinë publike, mbrojtjen e integritetit fizik dhe seksual, parandalimin e dhunës në familje, si dhe luftimin e veprimtarive të kundërligjshme që cenojnë rendin juridik.
Përmes këtyre procedurave, Prokuroria Themelore në Gjilan po vazhdon trajtimin e rasteve penale dhe ndërmarrjen e veprimeve ligjore ndaj personave të dyshuar, në përputhje me kompetencat dhe përgjegjësitë e saj institucionale./rajonipress/

