Përfundon ndërtimi i urës në Ajnoc, investim prej mbi 409 mijë eurosh nga Ministria e Infrastrukturës

Kamenicë – Ka përfunduar ndërtimi i urës në fshatin Ajnoc, një projekt infrastrukturore që pritet të përmirësojë ndjeshëm qarkullimin dhe sigurinë për banorët e kësaj ane.

Lajmin e ka bërë të ditur kryetari i Komunës së Kamenicës, Kadri Rahimaj, përmes një postimi në rrjetet sociale, duke theksuar rëndësinë e këtij investimi për përmirësimin e infrastrukturës dhe lehtësimin e jetës së qytetarëve.

Sipas Rahimajt, projekti është realizuar me një investim prej 409 mijë e 628 eurosh nga Ministria e Infrastrukturës dhe Transportit, ndërsa ura e re ofron kushte më të mira dhe më të sigurta për lëvizjen e banorëve dhe të gjithë pjesëmarrësve në trafik.

Përfundimi i këtij projekti përbën një ndërhyrje të rëndësishme në infrastrukturën lokale, duke lehtësuar qarkullimin dhe duke kontribuar në rritjen e sigurisë rrugore në këtë zonë.

Kryetari Rahimaj ka theksuar se investimet infrastrukturore do të vazhdojnë edhe në pjesët e tjera të komunës, me synimin për të përmirësuar shërbimet dhe kushtet e jetesës për qytetarët.

“Punë që shihen, projekte që mbesin”, ka qenë mesazhi i Rahimajt me rastin e përfundimit të këtij projekti në Ajnoc./rajonipress/