Kamenica shqyrton gjendjen e sigurisë në bashkësi, vëmendje e veçantë sigurisë në fshatrat rurale dhe parandalimit të dhunës në familje

Kamenicë – Në Komunën e Kamenicës është mbajtur mbledhja e radhës e Këshillit Komunal për Siguri në Bashkësi (KKSB), e udhëhequr nga kryetari i komunës, Kadri Rahimaj, ku në fokus të diskutimeve ishin gjendja e përgjithshme e sigurisë, siguria në vendbanimet rurale, masat parandaluese ndaj zjarreve dhe trajtimi institucional i rasteve të dhunës në familje.

Në këtë takim, me pjesëmarrjen e anëtarëve të KKSB-së dhe përfaqësuesve të institucioneve përkatëse, u shqyrtua një agjendë që përfshiu çështje me rëndësi për sigurinë publike dhe mirëqenien e qytetarëve të Kamenicës.

Pas miratimit unanim të procesverbalit nga mbledhja e kaluar dhe të rendit të ditës, vëmendje e veçantë iu kushtua situatës së sigurisë në komunë, me theks te zonat rurale dhe sfidat me të cilat mund të përballen banorët e këtyre vendbanimeve.

Komandanti i Stacionit Policor në Kamenicë prezantoi informacione mbi gjendjen aktuale të sigurisë, duke raportuar për angazhimin e Policisë së Kosovës në ruajtjen e rendit publik dhe parandalimin e dukurive që mund të cenojnë sigurinë e qytetarëve.

Një tjetër çështje e trajtuar ishte gatishmëria e institucioneve publike për parandalimin dhe menaxhimin e rasteve të zjarrit. Në këtë kontekst, u bë e ditur se të gjitha institucionet arsimore në Komunën e Kamenicës janë të pajisura me aparate kundër zjarrit.

Po ashtu, nxënësit dhe personeli arsimor kanë ndjekur trajnime të realizuara nga zjarrfikësit për përdorimin e këtyre pajisjeve dhe mënyrën e reagimit në situata emergjente. Këto masa u vlerësuan si pjesë e rëndësishme e kulturës parandaluese dhe rritjes së sigurisë në institucionet shkollore.

Në kuadër të diskutimeve nën pikën “Të ndryshme”, trajtim të veçantë mori edhe problematika e dhunës në familje në territorin e komunës. Anëtarët e këshillit kërkuan që në mbledhjen e ardhshme të prezantohet një raport më i detajuar për rastet e evidentuara, me qëllim të pasqyrimit më të qartë të përmasave të kësaj dukurie dhe koordinimit të përgjegjësive institucionale në parandalimin dhe trajtimin e saj.

Mbledhja përfundoi me theksimin e domosdoshmërisë së bashkëpunimit të vazhdueshëm ndërmjet institucioneve komunale, Policisë së Kosovës, institucioneve arsimore dhe mekanizmave të tjerë përgjegjës.

Forcimi i sigurisë në bashkësi, sidomos në vendbanimet rurale, parandalimi i rreziqeve në institucionet publike dhe trajtimi me përgjegjësi i dhunës në familje mbeten çështje që kërkojnë koordinim, angazhim dhe vëmendje të vazhdueshme institucionale./rajonipress/