Plagë shoqërore: Dhuna ndaj gruas nuk mund të ndalet vetëm me ligje

Nga Ismet Rashiti – Dhuna ndaj gruas nuk mund të ndalet vetëm me burgje dhe masa ndëshkuese, por, mbi të gjitha, përmes edukimit, kulturës dhe vetëdijes qytetare.

Dhuna ndaj gruas nuk është vetëm problem ligjor, por edhe problem shoqëror e kulturor. Burgjet dhe dënimet janë të domosdoshme për të ndëshkuar dhunuesit dhe për të mbrojtur viktimat, por parandalimi i dhunës fillon shumë më herët: në familje, në shkollë dhe në shoqëri.

Fëmijët duhet të edukohen me vlerat e respektit, barazisë, empatisë dhe përgjegjësisë. Duhet të mësohemi dhe t’i mësojmë brezat e rinj se dashuria nuk është kontroll, se forca nuk është autoritet dhe se gruaja nuk është pronë e askujt.

Një shoqëri e qytetëruar nuk matet vetëm me ashpërsinë e ligjeve, por edhe me mënyrën se si i edukon brezat që të mos ushtrojnë dhunë.

Megjithatë, edukimi dhe vetëdija nuk e zëvendësojnë ligjin. Ato duhet të ecin paralelisht me drejtësinë, mbrojtjen e viktimave dhe ndëshkimin e dhunuesve.

Sepse qëllimi nuk është vetëm ta dënojmë dhunën pasi ajo ndodh, por të ndërtojmë një shoqëri ku dhuna ndaj gruas të mos pranohet, të mos justifikohet dhe të mos përsëritet./rajonipress/