Devijimi i paqartë në rrugën drejt qendrës po shkakton tollovi, qytetarët kërkojnë sinjalistikë më profesionale

Gjilan – Një shigjetë mezi e dukshme po i huton shoferët në një nga rrugët kryesore që të çon drejt qendrës së qytetit. Qytetarët ankohen se devijimi i qarkullimit është sinjalizuar në mënyrë të pamjaftueshme, duke shkaktuar konfuzion, kthime në drejtim të kundërt dhe kolona të automjeteve.

Fotografia e siguruar nga vendi i ngjarjes tregon se në hyrje të një kantieri, qarkullimi është orientuar përmes një shigjete të vendosur në rrethojën metalike. Megjithatë, kjo sinjalistikë duket e pamjaftueshme për t’i orientuar qartë drejtuesit e automjeteve, veçanërisht ata që nuk e njohin mirë zonën.

Sipas ankesave të qytetarëve, shumë shoferë e ngatërrojnë drejtimin e lëvizjes, duke përfunduar në kahun e kundërt. Kjo situatë më pas krijon vështirësi në qarkullim, pritje dhe tollovi në këtë pjesë të qytetit.

Qytetarët shtrojnë edhe një çështje tjetër: nëse një projekt kap vlerën prej 18 milionë eurosh, atëherë kujdesi për organizimin e komunikacionit, sinjalistikën dhe informimin e drejtuesve të automjeteve duhet të jetë në nivelin më të lartë profesional.

Një investim i madh infrastrukturor nuk duhet të vlerësohet vetëm nga objekti që ndërtohet, por edhe nga mënyra se si menaxhohet hapësira përreth gjatë realizimit të punimeve.

Kërkesa e qytetarëve është e qartë: sinjalistikë e dukshme, orientim i kuptueshëm dhe masa konkrete për të shmangur konfuzionin në trafik.

Sepse një shigjetë e vetme, që mezi vërehet nga drejtuesit e automjeteve, nuk mund të jetë zgjidhje e mjaftueshme për organizimin e qarkullimit në një rrugë kaq të frekuentuar./rajonipress/