Gjilani në zi pas vrasjes së dyfishtë në Livoç të Ulët, dyshohet se biznesmeni vrau bashkëshorten dhe vëllain e saj

Gjilan – Një ngjarje e rëndë kriminale ka tronditur sot Gjilanin dhe mbarë shoqërinë, pas vrasjes së dyfishtë në fshatin Livoç i Ulët, ku dy persona humbën jetën nga të shtënat me armë zjarri. Viktimat janë identifikuar si Nafije Ramushi dhe vëllai i saj, Egzon, ndërsa si i dyshuar për këtë rast raportohet Valon Ramushi, bashkëshorti i Nafijes.

Sipas njoftimeve fillestare, i dyshuari është një biznesmen i njohur në rajonin e Anamoravës, i cili është vetëdorëzuar në Polici pas ngjarjes. Ai raportohet se ka në pronësi një lagje në Makresh, si dhe biznesin “Loni Therm”.

Dyshohet se një nga rrethanat që mund të ketë paraprirë tragjedinë ishte kërkesa e bashkëshortes për divorc. Megjithatë, motivi i vrasjes ende nuk është konfirmuar zyrtarisht nga organet e drejtësisë dhe mbetet pjesë e hetimeve.

Ngjarja ka lënë pas dhimbje të thellë dhe tronditje, duke rikthyer në vëmendje pasojat e rënda të dhunës brenda marrëdhënieve familjare. Humbja e dy jetëve në rrethana kaq tragjike është një goditje për familjet e viktimave dhe për gjithë komunitetin.

Sipas Policisë së Kosovës, përveç dy viktimave, një person tjetër ka mbetur i plagosur nga arma e zjarrit dhe është transferuar për trajtim të mëtejshëm në Qendrën Klinike Universitare të Kosovës. Në vendin e ngjarjes kanë dalë njësitë policore dhe dy prokurorë të Shtetit, ndërsa është sekuestruar edhe një armë zjarri që dyshohet të jetë përdorur në rast.

Hetimet po vazhdojnë në koordinim me Prokurorinë e Shtetit, me qëllim të zbardhjes së plotë të rrethanave dhe përcaktimit të motivit të kësaj tragjedie.

Përtej emrave, bizneseve dhe rrethanave që po hetohen, kjo ngjarje lë pas dy jetë të humbura, familje të goditura nga dhimbja dhe një komunitet që kërkon përgjigje për një tragjedi që nuk duhej të ndodhte./rajonipress/