Veteranët shqiptarë dhe kroatë bëjnë homazhe në Gjilan për dëshmorët Samet Bogujevci dhe Fadil Salihu

Gjilan – Një delegacion i veteranëve shqiptarë dhe kroatë ka vizituar Kompleksin e Varrezave të Dëshmorëve në Gjilan, ku ka bërë homazhe në nderim të dëshmorëve Samet Bogujevci dhe Fadil Salihu, të rënë në Gospiq të Kroacisë.

Delegacioni përbëhej nga gjenerali Esat Qollaku, president i Organizatës UABHDR, Tomë Kaqinari, kryetar i shoqatave vullnetare të luftëtarëve të Kroacisë, si dhe përfaqësues të tjerë të organizatave të veteranëve.

Gjatë vizitës, të pranishmit nderuan sakrificën dhe kontributin e dëshmorëve, duke përkujtuar angazhimin e tyre në luftën për liri.

Në këtë aktivitet morën pjesë edhe nënkryetari i Komunës së Gjilanit, Arianit Sadiku, dhe kryesuesja e Kuvendit Komunal, Krenare Latifi-Kqiku, të cilët shprehën respektin e tyre për dëshmorët dhe falënderuan delegacionin për vizitën dhe përkushtimin e vazhdueshëm në ruajtjen e kujtimit të bashkëluftëtarëve të rënë.

Vizita u zhvillua në shenjë nderimi dhe respekti për ata që dhanë jetën për liri, duke rikujtuar rëndësinë e ruajtjes së kujtesës historike dhe të lidhjeve ndërmjet veteranëve shqiptarë dhe kroatë.

Lavdi e përjetshme Samet Bogujevcit, Fadil Salihut dhe të gjithë dëshmorëve të lirisë!/rajonipress/