170 mijë euro për rrjetin e ujësjellësit në Grizim të Kamenicës

Kamenicë – Komuna e Kamenicës po investon 170 mijë euro në zgjerimin e rrjetit të ujësjellësit në fshatin Grizim, projekt që pritet të mundësojë kyçjen e 170 ekonomive familjare në sistemin e furnizimit me ujë.

Kryetari i Kamenicës, Kadri Rahimaj, së bashku me drejtorin Zotrim dhe kryeshefin e KRU “Hidromorava”, Ymer Salihu, ka inspektuar punimet në terren, duke bërë të ditur se projekti përfshin shtrirjen e rreth 2.9 kilometrave të rrjetit të ujësjellësit.

Sipas Rahimajt, punimet në këtë projekt janë duke vazhduar, ndërsa synimi është krijimi i kushteve për furnizim më të qëndrueshëm me ujë për familjet e kësaj zone.

“Detyrë e jona mbetet plotësimi i të gjitha kushteve për mirëqenie të qëndrueshme për qytetarët tanë”, ka shkruar Rahimaj në njoftimin e tij./rajonipress/