Nagavci mendon se PDK ka ndërmarrë iniciativë të nxituar për Dhomat e Specializuara

Kryetarja e Grupit Parlamentar të Lëvizjes Vetëvendosje, Arbërie Nagavci, ka folur për vendimin e Dhomave të Specializuara në Hagë ndaj katër ish-krerëve të UÇK-së, si dhe për situatën politike në Kosovë, ku kanë mbetur edhe shtatë ditë deri në përfundimin e afatit për zgjedhjen e presidentit të ri.

Nagavci tha se në këtë situatë është e rëndësishme që Kuvendi të vazhdojë punën me përgjegjësi të plota dhe të shmangen zgjedhjet e reja.

Ajo theksoi se zgjidhja duhet të jetë zgjedhja e një presidenti konsensual, në mënyrë që institucionet e Kosovës të vazhdojnë funksionimin normal.

“Kryeministri Kurti, që pas certifikimit të rezultateve, ka ftuar kryetarët e partive të tjera, të cilët janë takuar disa herë. Fatkeqësisht, deri më tani nuk kemi rezultat konkret”, tha Nagavci.

Ajo përmendi edhe marrëveshjen e mëparshme me kryetarin e LDK-së, Lumir Abdixhiku, për kandidaturën e Bekim Sejdiut për president.

“Ne kemi qenë në marrëveshje me zotin Abdixhiku për Bekim Sejdiun për president, një profesionist i vlerësuar, një ish-diplomat. Nëse do të ekzistonte vullneti i deputetëve për ta mbështetur, ai do të ishte i gatshëm të vazhdonte për t’u bërë pjesë e votimit”, u shpreh ajo.

Nagavci tha se, pas vendimit të Dhomave të Specializuara, Kuvendi duhet të fokusohet në përgjegjësitë e tij dhe të mos lejojë që vendi të shkojë në zgjedhje të reja.

“Është e rëndësishme që Kuvendi të vazhdojë punën me përgjegjësitë e veta të plota dhe të shmangim zgjedhjet e reja”, tha ajo, duke e cilësuar vendimin e Dhomave të Specializuara si të padrejtë.

Në lidhje me projektligjin e iniciuar nga PDK-ja për Dhomat e Specializuara, Nagavci e kritikoi këtë nismë, duke e cilësuar të nxituar.

Ajo tha se projektligji është dërguar në Qeveri për opinion, në përputhje me procedurat, por pretendoi se nisma nuk është diskutuar paraprakisht me deputetët e partive të tjera dhe as me ekipet mbrojtëse të ish-krerëve të UÇK-së në Hagë.

“Ndërkohë është tejet e rëndësishme që të veprojmë të unifikuar me strategji shtetërore për këtë vendim të padrejtë. Ne kemi këtë iniciativë të nxituar të PDK-së, të cilët janë të vetëdijshëm që vetëm shtatë ditë na ndajnë nga afati që Kushtetuesja e ka caktuar”, deklaroi Nagavci.

Sipas saj, një projektligj i tillë kërkon kohë për shqyrtim dhe nuk duhet të trajtohet me procedura të përshpejtuara.

“Deputetëve duhet t’u jepet koha e nevojshme për të shqyrtuar projektligjin. Hamza duhet të diskutojë me kryeministrin Kurti, pasi ne e kemi vullnetin për të adresuar këtë vendim të gjykatës”, tha ajo.

Nagavci shtoi se trajtimi i çështjes së Dhomave të Specializuara duhet të bëhet përmes bashkëpunimit ndërinstitucional dhe me një strategji të përbashkët shtetërore.

“Është e panevojshme dhe e dëmshme për vendin dhe katër ish-krerët e UÇK-së që të mundohemi që, për arsye partiake, shkaqe protagonizmi, të ndërmarrim veprime të përshpejtuara”, u shpreh ajo.

Ajo rikujtoi se Vetëvendosje e kishte kundërshtuar krijimin e Dhomave të Specializuara në vitin 2015.

“Ju e dini që në vitin 2015, kur u miratuan ndryshimet që mundësuan krijimin e Gjykatës Speciale, ne e kundërshtuam fuqishëm në Kuvend dhe patëm diskutime me qytetarët dhe gjithçka që kishim në dorë e bëmë që të mos krijohej kjo gjykatë, dhe e menduam që ishte e padrejtë”, tha Nagavci.

Në fund, ajo përsëriti qëndrimin e Vetëvendosjes se duhet të shmangen zgjedhjet e reja dhe të zgjidhet një president që do të mundësonte funksionimin e plotë të institucioneve.

“Duhet të trajtohet në mënyrën më të mirë të mundshme vendimi i Dhomave të Specializuara, në mënyrë bashkëpunimi, duke zgjedhur një president konsensual, që të gjitha institucionet të vazhdojnë punën në mënyrën e tyre normale”, tha ajo.

Nagavci argumentoi se zgjedhjet e reja nuk do të sillnin domosdoshmërisht ndryshim në rezultatet politike.

“Vullneti i Vetëvendosjes ka qenë që 16 shtatori të na gjente me institucione me kompetenca të plota. Sikur të varej nga ne, do të kishim presidentin e zgjedhur dhe Kuvendin funksional. Vendimi i 16 shtatorit vetëm se përshpejton ose rithekson edhe një herë atë që kemi thënë dhe ditur, që duhet të shmangen një palë zgjedhje të reja”, përfundoi ajo.