Uji “DEA” nga Kosova shtrihet në Kubë, prezente në gastronominë e Havanës që nga gushti i vitit 2025

Gjilan – Uji mineral nga Kosova “DEA” po zgjerohet në tregjet ndërkombëtare, duke gjetur vend edhe në tryezat e restoranteve në kryeqytetin e Kubës, Havana. Lajmin e ka bërë të ditur përmes një postimi në rrjetet sociale Alban Shala, përfaqësues i Ujit DEA, i cili ka publikuar edhe pamje nga një prej lokaleve në Havana, ku shihen shishet e produktit kosovar.

Sipas Shalës, që nga gushti i vitit 2025, Uji DEA është pjesë e gastronomisë në Havana dhe po shërbehet në restorante të ndryshme të kryeqytetit kubanez.

“Nga Kosova, në tryezat e botës”, ka shkruar Shala, duke e cilësuar prezencën në Kubë si një tjetër destinacion për produktin kosovar dhe si dëshmi të cilësisë së tij.

Në postimin e publikuar me mbishkrimin “DEA në Havana. Nga burimi ynë, deri në Kubë”, Shala ka vënë në pah shtrirjen ndërkombëtare të markës dhe depërtimin e saj në një treg të largët jashtë rajonit.

Prezenca e një produkti të prodhuar në Kosovë në restorante të Havanës paraqitet si pjesë e përpjekjeve për zgjerimin e eksporteve dhe promovimin e produkteve kosovare në tregjet ndërkombëtare./rajonipress/