Rahimaj: Po vazhdon puna për trotuarin përgjatë zonës së pishave në Karaçevë të Poshtme

Kamenicë – Kryetari i Komunës së Kamenicës, Kadri Rahimaj, ka bërë të ditur se po vazhdojnë punimet për ndërtimin e trotuarit përgjatë zonës së pishave në Karaçevë të Poshtme, në segmentin nga shkolla deri te kufiri me Muhovcin.

Sipas Rahimajt, projekti përfshin ndërtimin e trotuarit në një gjatësi prej 1,760 metrash, me vlerë prej 203,450.20 eurosh.

Në kuadër të projektit është paraparë edhe vendosja e ndriçimit publik dhe ulëseve përgjatë gjithë segmentit, duke synuar përmirësimin e kushteve për lëvizjen dhe përdorimin e kësaj hapësire nga banorët.

Rahimaj ka theksuar se investimi synon përmirësimin e infrastrukturës dhe sigurisë në këtë pjesë të Karaçevës së Poshtme, si dhe krijimin e një hapësire më funksionale dhe me pamje më të përshtatshme për komunitetin.

Punimet përfshijnë kështu jo vetëm ndërtimin e trotuarit, por edhe elemente përcjellëse që synojnë ta bëjnë këtë segment më të sigurt dhe më të përdorshëm për qytetarët./rajonipress/