Kamenicë, konsultim publik për Draft-Rregulloren e Kodit të Etikës në administratën komunale

Kamenicë – Në Komunën e Kamenicës është mbajtur konsultimi publik për Draft-Rregulloren për Kodin e Etikës, dokument që synon të përcaktojë standardet e sjelljes dhe paraqitjes së zyrtarëve komunalë dhe të kontribuojë në funksionimin më të mirë të administratës.

Konsultimi u organizua nga grupi punues për hartimin e draft-rregullores, ndërsa në takim morën pjesë anëtarë të grupit punues dhe zyrtarë komunalë. Në hapje të diskutimit, kryesuesi i grupit punues, Fisnik Kastrati, tha se bëhet fjalë për dokumentin e parë të këtij lloji në Komunën e Kamenicës.

Sipas Kastratit, hartimi i dokumentit është rezultat i punës së grupit punues në bashkëpunim me drejtuesit komunalë, me synim që rregullat e përcaktuara të jenë të pranueshme dhe të zbatueshme për administratën.

Gjatë takimit, anëtarja e grupit punues, Bejaze Morina, prezantoi pikat kryesore të draft-rregullores. Dokumenti përfshin çështje që lidhen me marrëdhëniet e zyrtarëve me qytetarët, kodin e veshjes dhe paraqitjen profesionale, paanshmërinë politike, pranimin e dhuratave dhe favoreve, përdorimin e pasurisë komunale, sjelljen në rrjetet sociale, angazhimin në punë të dytë dhe konfliktin e interesit, si dhe takimet me operatorët ekonomikë.

Diskutimi publik u shoqërua me pyetje dhe propozime nga të pranishmit, të cilat u fokusuan në dispozitat për kodin e veshjes, higjienën, dhuratat, konfliktin e interesit, qasjen në dokumentet publike, mbrojtjen e të dhënave personale dhe trajtimin e rasteve specifike që lidhen me natyrën e punës apo me arsye shëndetësore.

Në përfundim, grupi punues bëri të ditur se komentet, vërejtjet dhe propozimet e paraqitura gjatë konsultimit do të shqyrtohen dhe do të merren në konsideratë gjatë procesit të finalizimit të Draft-Rregullores për Kodin e Etikës së Komunës së Kamenicës./rajonipress/