Qytetarët e Gjilanit 11 ditë në terr, kërkojnë përgjigje dhe zgjidhje nga Komuna

Gjilan – Për të njëmbëdhjetën ditë me radhë, qytetarët e Gjilanit dhe të disa fshatrave përreth po përballen me mungesën e ndriçimit publik, ndërsa pakënaqësia dhe shqetësimi i tyre po rriten nga dita në ditë.

Rrugë dhe lagje të tëra mbeten të pandriçuara gjatë orëve të mbrëmjes, duke vështirësuar lëvizjen e qytetarëve dhe duke shtuar shqetësimet për sigurinë në hapësirat publike. Banorët kërkojnë nga institucionet komunale një sqarim të qartë se çfarë e ka shkaktuar situatën dhe kur pritet rikthimi i ndriçimit.

Ndërkohë, mungesa e komunikimit zyrtar ka shtuar edhe më shumë pakënaqësinë. Qytetarët presin të dinë nëse problemi lidhet me obligimet financiare të Komunës ndaj KEDS-it, sa janë detyrimet eventuale dhe cilat masa po ndërmerren për zgjidhjen e situatës.

Përtej problemit teknik apo financiar, për qytetarët çështja tashmë është kthyer në një problem të përditshëm. Errësira në rrugë dhe hapësira publike ndikon në lëvizjen e tyre dhe në perceptimin e sigurisë, veçanërisht gjatë orëve të natës.

Në mungesë të një sqarimi të plotë institucional, pyetjet e qytetarëve mbeten të njëjta: Pse Gjilani është ende në terr pas 11 ditësh? Kush mban përgjegjësi për situatën dhe kur do të rikthehet ndriçimi publik?

Përgjigjet tashmë nuk kërkohen vetëm përmes ankesave individuale, por gjithnjë e më shumë si një kërkesë qytetare për transparencë, përgjegjësi dhe zgjidhje konkrete./rajonipress/