Në Skifteraj u përkujtuan katër nxënësit martirë të rënë nga minat në vitin 1999

Viti – Në fshatin Skifteraj të Komunës së Vitisë u zhvillua sot ceremonia përkujtimore për katër nxënësit martirë, të cilët humbën jetën tragjikisht nga minat në vitin 1999.

Ceremonia u mbajt në vendin ku kishte ndodhur tragjedia, duke rikujtuar humbjen e katër nxënësve dhe dhimbjen që kjo ngjarje la te familjet e tyre dhe banorët e kësaj ane.

Në nderim të viktimave, homazhe pranë varrezave të tyre bëri edhe zëvendëskryetari i Komunës së Vitisë, Hasan Aliu, i shoqëruar nga përfaqësues të shoqatave të dala nga lufta, subjekteve politike dhe institucioneve, si dhe nxënës e personel i shkollës “Kenan Halimi” dhe qytetarë të shumtë.

Të pranishmit vendosën kurora lulesh dhe nderuan kujtimin e katër nxënësve, duke vënë në pah rëndësinë e ruajtjes së kujtesës për viktimat e luftës dhe pasojat e saj mbi familjet dhe komunitetet në Kosovë./rajonipress/