Komuna e Kamenicës vazhdon investimet në infrastrukturën e Topanicës dhe Karaçevës së Epërme

Kamenicë – Komuna e Kamenicës po vazhdon investimet në infrastrukturën rrugore dhe hapësirat publike në disa lokalitete të saj. Punimet në terren janë përcjellë nga afër nga kryetari i komunës, Kadri Rahimaj, së bashku me përfaqësues të ekzekutivit komunal dhe stafit të administratës.

Në fshatin Topanicë ka vazhduar asfaltimi i rrugëve, si pjesë e vazhdimit të një projekti të mëhershëm. Sipas Komunës së Kamenicës, janë asfaltuar “Rruga e Lugit të Demës”, “Rruga Mulla Rexhepi” dhe “Rruga Jakup Jakupi”.

Komuna thotë se investimet në infrastrukturën rrugore synojnë përmirësimin e qarkullimit dhe krijimin e kushteve më të sigurta për banorët.

Ndërkohë, në Karaçevë të Epërme janë realizuar punime për rregullimin e trotuarit, në vlerë prej 203 mijë eurosh, ndërsa për rregullimin e varrezave janë investuar 113,996 euro.

Gjatë vizitës në këto lokalitete, kryetari Rahimaj ka bashkëbiseduar edhe me banorët, duke deklaruar se Komuna e Kamenicës do të vazhdojë investimet në infrastrukturë dhe hapësira publike.

Sipas tij, qëllimi i këtyre projekteve është përmirësimi i kushteve të jetesës dhe i infrastrukturës në lokalitetet e Komunës së Kamenicës./rajonipress/