KKSB: Situata e sigurisë në Viti e qetë dhe stabile

Viti – Këshilli Komunal për Siguri në Bashkësi (KKSB) e ka vlerësuar si të qetë, stabile dhe të menaxhueshme situatën e përgjithshme të sigurisë në Komunën e Vitisë.

Vlerësimi është bërë në mbledhjen e katërt të rregullt të KKSB-së, të kryesuar nga zëvendëskryetari i Komunës së Vitisë, Hasan Aliu.

Ai ka theksuar se bashkëpunimi ndërmjet institucioneve komunale dhe mekanizmave të sigurisë, përfshirë Policinë e Kosovës dhe KFOR-in, ka qenë i rëndësishëm në ruajtjen e rendit dhe sigurisë në komunë.

Në takim është diskutuar edhe fillimi i vitit të ri shkollor 2026/2027. Zyrtari i Drejtorisë së Arsimit, Xhevdet Llulleci, ka bërë të ditur se procesi mësimor ka nisur pa probleme të theksuara.

Komandanti i Stacionit Policor në Viti, kapiten Ruzhdi Abdullahu, ka prezantuar statistikat e rasteve të raportuara gjatë periudhës së fundit, duke vlerësuar se gjendja e sigurisë mbetet stabile dhe e menaxhueshme.

Në fokus të diskutimeve ka qenë edhe data 16 shtator, kur pritet vendimi i Gjykatës Speciale në Hagë lidhur me ish-pjesëtarët e UÇK-së. Kapiten Abdullahu u ka bërë apel qytetarëve që ta presin vendimin me qetësi, përgjegjësi dhe maturi, duke shmangur provokimet dhe çdo veprim që mund të çojë në incidente.

Megjithatë, gjatë mbledhjes janë ngritur edhe disa shqetësime konkrete. Anëtarët e KKSB-së kanë diskutuar dy rastet e sulmeve fizike ndaj punëtorëve shëndetësorë – një në QKMF-në e Vitisë dhe tjetri në Qendrën e Mjekësisë Familjare në Pozheran.

Po ashtu, është diskutuar edhe rasti i fundit i lëndimit të një punonjëseje në një qendër tregtare në Viti. Me këtë rast është kërkuar angazhim më i madh i inspektorëve në terren dhe forcim i kontrolleve për të garantuar siguri më të madhe për punëtorët.

Në përfundim, anëtarët e KKSB-së kanë vlerësuar se bashkëpunimi i vazhdueshëm ndërmjet institucioneve lokale dhe mekanizmave të sigurisë është thelbësor për parandalimin e incidenteve dhe ruajtjen e një klime të sigurt për qytetarët e Komunës së Vitisë./rajonipress/