Kosova pa institucione, qytetarët me fatura gjithnjë e më të larta

Kosova po rrëshqet sërish në një spirale të frikshme shtrenjtimesh, duke lënë pas iluzionin dy-mujor të një stabilizimi të përkohshëm.

Sipas shifrave nga Agjencia e Statistikave të Kosovës, Indeksi i Harmonizuar i Çmimeve të Konsumit shënoi kërcim prej 0,6% vetëm gjatë muajit korrik, duke e çuar normën vjetore të inflacionit në 6,5%.

Kthesa e menjëhershme ndërpreu prirjen rënëse që u pa gjatë majit (6,8%) dhe qershorit (6,0%), pas kulmit prej 7,5% në prill. Në vend të lehtësimit, korriku riktheu barrën e rëndë të kostos së jetesës për çdo familje në vend.

Inflacioni në Kosovë · Korrik 2026

Rikthehet inflacioni
Norma vjetore e inflacionit u ngrit në 6,5%, pas rënies në 6,0% gjatë qershorit.

Prill 7,5%→Maj 6,8%→Qershor 6,0%→Korrik 6,5% ↑

Kategoria Mujor Vjetor
Inflacioni totalIHÇK, korrik 2026 +0,6% +6,5%
Transporti +4,3% +17,8%
Karburante & lubrifikantëPër automjete +7,0% +25,0%
Dizel 1,47 € → 1,58 € +28,5%*
Benzinë — +14,4%*
Ushqime & pije joalkoolike32,8% e shportës −1,0% +2,7%
Strehim, ujë, energji & lëndë djegëse 0,0% +11,1%
Restorante & akomodim +1,0% +5,3%
Shëndetësi −0,1% +4,0%
Kujdes personal — +3,7%
Burimi: Agjencia e Statistikave të Kosovës (ASK), IHÇK – korrik 2026. *Ndryshimi i çmimit mesatar të produktit, jo nënindeksi zyrtar.

Karburantet dhe transporti në kulm
Goditjen më të rëndë e morën derivatet:

Karburantet dhe lubrifikantët u shtrenjtuan me plot 25% brenda një viti (dhe 7% vetëm nga qershori në korrik).

Nafta (dizel), e cila në korrikun e kaluar tregtohej mesatarisht me 1,23 € për litër, këtë korrik ka arritur në 1,58 € (nga 1,47 € që ishte në qershor). Për një rezervuar standard prej 50 litrash, qytetarët tashmë paguajnë rreth 17,5 euro më shumë për çdo mbushje.

Benzina u ngjit nga 1,25 € në 1,43 € për litër.

Tarifat e shërbimeve të udhëtimit të pasagjerëve janë fryrë me 43,1%, transporti rrugor me 15,6%, ndërsa ai ajror ka shënuar një kërcim prej 87,7% — i ndikuar nga fluksi sezonal i mërgatës, por gjithsesi një faktor rëndues në shportën e përgjithshme, shkruan Nacionale.

Nga energjia te tryeza e bukës
Edhe pse artikujt ushqimorë shënuan rënie të lehtë mujore prej 1%, në krahasim me vitin e kaluar ata mbeten 2,7% më të shtrenjtë.

Mishi është shtrenjtuar me 9,1% (një kilogram mish gjedhi pa eshtra ka kërcyer nga 10,78 € në 12,04 €).

Drithërat dhe nënproduktet e tyre janë rritur me 1,3%.

Përtej ushqimit, faturat themelore të jetesës vazhdojnë të gërryejnë të ardhurat:

Strehimi, uji, energjia elektrike dhe lëndët djegëse janë 11,1% më të shtrenjta krahasuar me korrikun e kaluar.

Shërbimet hoteliere dhe restorantet u rritën me 5,3%, shëndetësia me 4%, kurse përkujdesi personal me 3,7%.

Në terma konkretë, indeksi i përgjithshëm i çmimeve nga 102,2 pikë në dhjetor arriti në 106,7 pikë në korrik. Një shportë e njëjtë konsumi që në fundvit kushtonte 1.000 euro, sot kërkon minimalisht 1.044 euro.

Kjo goditje e re e çmimeve po ndodh në kohën kur vendi ndodhet në amulli të plotë institucionale. Kuvendi i dalë nga zgjedhjet e 7 qershorit vazhdon të jetë i pakonstituuar, ndonëse afati kushtetues 30-ditor skadoi më 7 gusht.

Opozita e ka akuzuar ashpër Vetëvendosjen për uzurpim dhe bllokadë të institucioneve, ndërsa administrata e Kuvendit as nuk ka bërë përgatitje për seancë pa marrë urdhër politik.