“Hidromorava” intensifikon shkyçjet nga rrjeti: Në fokus konsumatorët me dy ose më shumë fatura të papaguara

Gjilan – KRU “Hidromorava” SH.A. ka vijuar aksionin për shkyçjen nga rrjeti i ujësjellësit të konsumatorëve që kanë dy ose më shumë fatura të papaguara, me mbështetjen e Policisë së Kosovës.

Përmes një njoftimi, kompania u ka bërë thirrje konsumatorëve që të rregullojnë sa më parë obligimet e tyre financiare, duke paralajmëruar se mospagesa mund të çojë edhe në procedura përmbarimore.

Sipas “Hidromoravës”, konsumatorët kanë mundësi të shmangin shkyçjen duke shlyer borxhin e akumuluar ose duke lidhur marrëveshje për riprogramimin e pagesës.

Kompania ka apeluar te konsumatorët që të paraqiten në zyrat e saj për të rregulluar obligimet dhe për të shmangur pasojat që mund të rrjedhin nga faturat e papaguara.

“Pagesa e ujit është obligim – mosrregullimi i saj sjell pasoja direkte”, thuhet në njoftimin e KRU “Hidromorava” SH.A., e cila ka paralajmëruar se aksioni i shkyçjeve do të vazhdojë./rajonipress/