Tahiri: S’guxon të bëhet Kuvendi muze, bllokada nga LVV-ja është abuzim
RajoniPress
17:12, 10 Gusht, 2026
| 2 orë më parë
Shefi i grupit parlamentar të Aleancës, Besnik Tahiri, ka kritikuar zvarritjen e vazhdimit të seancës për konstituimin e Kuvendit.
Përmes një videoje nga ambientet e Kuvendit, Tahiri tha se seanca është dashur të vazhdojë, por se deputetët nuk kanë marrë asnjë ftesë.
“Po ju drejtohem nga Kuvendi. Në këtë kohë është dashur të fillojë vazhdimi i seancës për konstituimin e Kuvendit, e nuk kemi asnjë ftesë. Është shkelur rregullorja e punës së Kuvendit, është shkelur aktvendimi i Kushtetueses”, tha Tahiri.
Ky Kuvend është bërë një vend muzeal, është thatë, askush.
Thonë që janë hapur zyrat për vëllezërit dhe motrat e diasporës, nuk ka asnjë lëvizje të vetme. Mund ta shihni vetë se si është situata në Kuvend”, deklaroi ai.
Tahiri theksoi se Kuvendi duhet të ushtrojë funksionin e tij dhe të nisë punën.
“Nuk guxon Kuvendi të bëhet muze. Kuvendi është këtu për ta ushtruar funksionin e vet, për ta filluar punën. Kjo bllokadë është shkelje dhe abuzim”, përfundoi Tahiri.
