Qytetari dorëzon në Polici portofolin e gjetur me dokumente dhe para, i kthehet pronarit në Viti

Gjilan – Një gjest i ndershëm qytetar ka bërë të mundur që një portofol i humbur me dokumente personale, karta bankare dhe para të gatshme t’i kthehet pronarit të tij në Viti.

Sipas njoftimit të Drejtorisë Rajonale të Policisë në Gjilan, më 6 gusht 2026, qytetari B. Haziri është paraqitur në Stacionin Policor në Viti, ku ka dorëzuar një portofol të gjetur. Pas pranimit të tij, zyrtarët policorë kanë ndërmarrë menjëherë veprimet e nevojshme operative dhe, pas verifikimit të dokumentacionit, kanë identifikuar dhe kontaktuar pronarin legjitim, të cilit i janë kthyer të gjitha sendet e humbura.

Drejtoria Rajonale e Policisë në Gjilan ka shprehur mirënjohje për veprimin e qytetarit, duke vlerësuar se raste të tilla dëshmojnë rëndësinë e bashkëpunimit dhe besimit ndërmjet qytetarëve dhe Policisë së Kosovës, në funksion të forcimit të sigurisë dhe mirëqenies në komunitet./rajonipress/