Interesim i ulët i qytetarëve për planifikimin e buxhetit në Gjilan

Gjilan – Me një pjesëmarrje të vogël të qytetarëve, në Shkollën e Muzikës në Gjilan u mbajt takimi publik për planifikimin e buxhetit komunal, në kuadër të procesit të konsultimit me publikun për prioritetet e vitit të ardhshëm.

Takimi u drejtua nga kryesuesja e Kuvendit Komunal, Krenare Latifi Kqiku, ndërsa të pranishëm ishin edhe drejtori i Shërbimeve Publike, Kushtrim Ibrahimi, drejtori për Buxhet dhe Financa, Avdyl Kastrati, si dhe këshilltari komunal, Fadil Ademi.

Sipas njoftimit të Komunës së Gjilanit, gjatë diskutimit u paraqitën kërkesa, propozime dhe prioritete nga qytetarët pjesëmarrës, të cilat do të shqyrtohen në procesin e hartimit të buxhetit komunal.

Megjithatë, pjesëmarrja e kufizuar në këtë takim nxori në pah interesimin e ulët të qytetarëve për t’u përfshirë në një proces që ka ndikim të drejtpërdrejtë në përcaktimin e investimeve dhe shërbimeve publike në komunë. Konsultimet publike për buxhetin konsiderohen një mekanizëm i rëndësishëm për përfshirjen e qytetarëve në vendimmarrjen lokale dhe për adresimin e nevojave të komunitetit./rajonipress/