Kalaja e Binçës në qendër të vëmendjes shkencore, në Viti mbahet simpoziumi për historinë dhe trashëgiminë kulturore

Viti – Vitia është shndërruar në qendër të diskutimeve shkencore mbi trashëgiminë kulturore, me organizimin e Simpoziumit Shkencor “Kalaja e Binçës – Histori, Trashëgimi, Shqipëri”, një aktivitet që mblodhi studiues, profesorë universitarë, arkeologë, përfaqësues institucionesh, klerikë dhe veprimtarë të kulturës për të trajtuar vlerat historike e identitare të një prej monumenteve më të rëndësishme të rajonit.

Simpoziumi u mbajt në Shtëpinë e Kulturës “Gursel e Bajram Sylejmani” në Viti, nën patronatin e kryetarit të Komunës, Sokol Haliti, dhe në organizim të Famullisë së Binçës. Gjatë punimeve u prezantuan kumtesa shkencore që sollën fakte, hulumtime dhe analiza mbi rëndësinë historike, arkeologjike dhe kulturore të Kalasë së Binçës, duke e vlerësuar atë si një pasuri të rëndësishme të trashëgimisë shqiptare.

Në fjalën e tij përshëndetëse, kryetari Sokol Haliti theksoi se ruajtja, studimi dhe promovimi i trashëgimisë kulturore janë obligim institucional dhe kombëtar, pasi përmes tyre ruhet identiteti historik dhe krijohen mundësi të reja zhvillimi për komunitetin.

Në kuadër të simpoziumit, Haliti prezantoi edhe kumtesën e tij me temën “Nga Kalaja e Binçës deri te Gryka e Moravës – Trashëgimia kulturore si vizion për zhvillim të qëndrueshëm”, ku paraqiti strategjinë e Komunës së Vitisë për mbrojtjen, valorizimin dhe promovimin e monumenteve kulturore, duke i konsideruar ato si potencial të rëndësishëm për zhvillimin turistik, ekonomik dhe kulturor të komunës.

Organizatorët vlerësuan se ky simpozium përbën një kontribut të rëndësishëm në avancimin e kërkimeve shkencore dhe në promovimin e vlerave historike të Kalasë së Binçës, ndërsa Komuna e Vitisë ritheksoi përkushtimin për të mbështetur iniciativa që ruajnë dhe afirmojnë trashëgiminë kulturore si një nga shtyllat kryesore të identitetit dhe zhvillimit të qëndrueshëm./rajonipress/