Prokuroria Themelore në Gjilan ngre 14 aktakuza ndaj 16 personave, dy të ndaluar për narkotikë dhe tentim-ryshfeti

Gjilan – Prokuroria Themelore në Gjilan ka intensifikuar veprimet e saj në luftën kundër kriminalitetit, duke ngritur 14 aktakuza ndaj 16 personave të dyshuar për vepra të ndryshme penale, ndërsa gjatë 24 orëve të fundit janë ndaluar edhe dy persona me urdhër të prokurorit.

Sipas njoftimit të prokurorisë, Departamenti i Përgjithshëm ka ndaluar një person për veprën penale “Posedimi i paautorizuar i narkotikëve, substancave psikotrope ose analoge”, me masë ndalimi prej 48 orësh.

Ndërkohë, Departamenti për Krime të Rënda ka ndaluar një person tjetër, gjithashtu për 48 orë, nën dyshimin për veprën penale “Dhënia e ryshfetit në tentativë”, rast që do të trajtohet në procedurat e mëtejshme hetimore.

Përveç ndalimeve, Prokuroria Themelore në Gjilan ka ngritur 14 aktakuza kundër 16 personave, të cilët dyshohen për kryerjen e veprave të ndryshme penale.

Aktakuzat përfshijnë një rast për veprën penale “Sulmi”, një rast për “Vjedhje”, tri aktakuza kundër tre personave për posedim të paautorizuar të narkotikëve, substancave psikotrope ose analoge, si dhe një aktakuzë kundër dy personave për veprën penale “Lëndimi i lehtë trupor”.

Prokuroria ka bërë të ditur se procedurat penale do të vazhdojnë në përputhje me legjislacionin në fuqi, ndërsa rastet do të trajtohen nga gjykatat kompetente, ku do të vendoset mbi përgjegjësinë penale të të akuzuarve./rajonipress/