Karadaku nderon historinë e arsimit shqip, ish-mësimdhënësit vlerësohen për kontributin e tyre ndër dekada

Gjilan – Në një atmosferë emocionesh, kujtimesh dhe mirënjohjeje, Karadaku i Idriz Seferit u bë vendtakim i brezave të arsimit shqip, ku në ambientet e SHFMU “Migjeni” në Caravajkë u organizua një manifestim përkujtimor kushtuar historisë së shkollës dhe kontributit të mësimdhënësve që ndërtuan themelet e dijes në këtë trevë.

Në këtë aktivitet morën pjesë ish-nxënës, ish-mësimdhënës, arsimdashës dhe qytetarë të shumtë, të cilët rikujtuan rrugëtimin e arsimit shqip dhe sfidat e kapërcyera ndër vite në edukimin e brezave.

Një moment i veçantë i manifestimit ishte ndarja e mirënjohjeve për ish-mësimdhënësit dhe punëtorët teknikë, në shenjë vlerësimi për kontributin e tyre të dhënë gjatë periudhës 1947–1995, duke lënë gjurmë të pashlyeshme në historinë e shkollës dhe të arsimit në Karadak.

Peshë të veçantë ngjarjes i dha pjesëmarrja e familjes Gashi, përkatësisht e Elizabeta Gashit, vajza e Mark Gashit, Aurora Gashit, vajza e poetit Mirko Gashi, si dhe Prof. Dr. Sebastian Nuiçit, dhëndri i Mark Gashit, prania e të cilëve u mirëprit nga të pranishmit si një nderim për figurat e shquara që kanë lënë gjurmë në jetën kulturore dhe arsimore shqiptare.

Në shenjë respekti dhe kujtese, veterani i arsimit dhe ish-mësimdhënësi i kësaj shkolle, Prof. Xhelil Rrahmani, shpërndau dhurata simbolike për pjesëmarrësit, duke e bërë edhe më domethënës këtë takim që shërbeu si urë lidhëse mes brezave dhe si homazh për misionin fisnik të mësuesit shqiptar.

Manifestimi u vlerësua si një dëshmi se historia e arsimit nuk ruhet vetëm në dokumente, por mbi të gjitha në kujtesën e njerëzve që ia kushtuan jetën dijes, gjuhës shqipe dhe edukimit të brezave./rajonipress/