Ushtar besnik i Atdheut

Poezi nga Arif Ejupi – kushtuar Zejnullah Zejnullahut – Zenës, pjesëtar i celulës së parë të UÇK-së, në Zonën Operative të Llapit, me rastin e 76-vjetorit të lindjes.

I ekuilibruar në hapa,
i matur në mendim,
i palodhur në punë.
I etshëm për dije e edukim,
si toka e zhuritur për shiun.

I vendosur dhe i besës,
me rrënjë të thella në vatrën e vet.

Fisnik si Nazim Gafurri,
që Kosovën ta shihte
në dritë,
shiti tokë e bagëti,
sepse e dinte
se liria kërkon
gjak dhe çmim.

Braktisi lukset e Zvicrës,
zgjodhi baltën e vendit të vet
dhe radhët e Ushtrisë Çlirimtare të Kosovës –
aty ku Atdheu mbrohej
me guxim e zemër.
As dikur,
as sot,
nuk ishte lakmitar.

Nuk kërkoi grada,
as lavdi.

Përherë i gatshëm
që, përveç pasurisë,
Kosovës dhe Shqipërisë
edhe jetën t’ua falë.

I paepur dhe me parime,
lis që nuk e përkuli asnjë furtunë,
vlerë e rrallë e UÇK-së.