Burim Berisha ngre shqetësimin: Rikonstruktimi i rrugës “Haki Myderizi” të mos përsërisë problemin me trotuaret e ngushta

Gjilan – Teksa kanë nisur punimet për rikonstruktimin e rrugës “Haki Myderizi”, që lidh lagjen Dardania me pjesën tjetër të qytetit, Burim Berisha ka përshëndetur investimin, por njëkohësisht ka ngritur shqetësime lidhur me projektin.

Sipas tij, nga ecuria e deritanishme e punimeve dhe mënyra e vendosjes së trotuareve, krijohet përshtypja se ato do të mbeten sërish tepër të ngushta, duke përsëritur një problem që ka ekzistuar që nga ndërtimi i rrugës.

Berisha thekson se trotuare me këto përmasa do të vazhdojnë ta vështirësojnë lëvizjen e këmbësorëve, veçanërisht për prindërit me karroca fëmijësh, personat me aftësi të kufizuara dhe të moshuarit.

Ai vlerëson se, meqenëse punimet ende janë në zhvillim, ekziston mundësia që projekti të rishikohet.

Sipas propozimit të tij, në disa pjesë mund të reduktohen ose të hiqen hapësirat për parkim, në mënyrë që të krijohen trotuare më të gjera, më të sigurta dhe më funksionale për të gjithë qytetarët./rajonipress/