Hoti kritikon Qeverinë për koston e jetesës, e merr shembull kryeministrin e ri britanik: Duhet të ulen ngarkesat tatimore për familjet

Deputeti i zgjedhur i Lidhjes Demokratike të Kosovës (LDK), Avdullah Hoti, ka kritikuar Qeverinë për, siç ka thënë ai, mungesën e masave për zbutjen e kostos së jetesës, duke e krahasuar qasjen e saj me atë të Mbretërisë së Bashkuar dhe disa vendeve të Bashkimit Europian.

Hoti tha se kryeministri i ri i Mbretërisë së Bashkuar ndër veprimet e para ka marrë vendim për uljen e ngarkesave tatimore në faturat e energjisë, me synim lehtësimin e barrës për familjet, duke shtuar se masa të ngjashme janë zbatuar edhe nga disa qeveri të BE-së.

“Me qëllim të zvogëlimit të kostos së jetesës për familje, puna e parë që bëri Kryeministri i ri i Mbretërisë së Bashkuar ishte ulja e ngarkesave tatimore në faturat e energjisë. Një masë e tillë është marrë më herët edhe nga disa qeveri të Bashkimit Evropian.”, shkroi ai në një postim në Facebook.

Në Kosovë, “ndodh e kundërta”, tha Hoti.

“Jo që nuk janë ulur ngarkesat tatimore në faturat e energjisë, por energjia është shtrenjtuar disa herë. Edhe për naftën, rritja e çmimeve në tregjet ndërkombëtare është reflektuar drejtpërdrejt te konsumatori. Meqë TVSH-ja llogaritet mbi çmimin e produktit, sa më i lartë çmimi i naftës, aq më e lartë është edhe shuma e TVSH-së që paguan qytetari. Përmes vendosjes së çmimit maksimal ditor, Qeveria zyrtarisht e ka bartur tek konsumatori i fundit rritjen e çmimit të furnizimit të naftës”, shkroi ai.

Problemi nuk mbaron këtu, sipas Hotit. “Mosveprimet e qeverisë sot lënë pasoja afatgjata në zhvillimin e gjithmbarshëm njerëzor në Kosovë”.

“Kur çmimet e të mirave elementare, siç janë energjia, rriten përtej trendit të zakonshëm dhe të pritshëm vjetor, zakonisht familjet i ulin shpenzimet në: arsim, shëndetësi, cilësinë e ushqimit, kulturë e rekreacion. Kjo mund të ketë pasoja të rënda dhe afatgjata, sidomos për fëmijët dhe familjet me të ardhura të ulëta”, shkroi ai.

“Në situata të tilla është jetike roli i shtetit për të parandaluar uljen e konsumit të familjeve për të mira elementare. Një qeveri e përgjegjshme këtë e bën duke marrë përsipër një pjesë të rritjes së kostos së jetesës përmes uljes së ngarkesave tatimore për familje. Ulja e barrës tatimore sot është më e lirë për shtetin sesa kostoja që do të paguajmë nesër për familjet që sot detyrohen të heqin dorë nga shumë nevoja, duke e dëmtuar kështu zhvillimin afatgjatë të anëtarëve të tyre”, shtoi Hoti.

Ai thotë se qeverisja e mirë nuk matet vetëm me sa të hyra mbledh shteti, por me trendin e mirëqenies së qytetarëve.