Zbardhja e fondeve milionëshe, e bllokuar nga politika

Prokuroria e Shtetit të Kosovës nuk i heton kontributet për luftën.Politikanët e partive në pushtet dyshohet se përfituan paligjshëm.

Pavarësisht shqetësimeve të ngritura në opinionin kosovar për keqpërdorimin e fondit të 3-përqindëshit dhe “Vendlindja Thërret”, drejtësia e kapur nuk guxon as të flasë, e lëre më të nisë hetime

Pavarësisht se ka kohë që në opinionin publik është shtruar nevoja e hetimit dhe gjykimit të abuzimeve me fondet e luftës, Fondin “Vendlindja Thërret” dhe Fondin e 3- përqindëshit, qoftë përmes shqetësimeve të shumta të ngritura, në debate politike apo edhe nga opinionistë të ndryshëm, Prokuroria e shtetit akoma nuk ka nisur ndonjë hetim rreth këtyre dyshimeve.

Pavarësisht që flitet me të madhe se këto dy fonde, janë baza e pasurisë qindra milionëshe e politikanëve kosovarë që është krijuar duke vjedhur paratë e qytetarëve kosovarë të dhëna në interes të lirisë dhe shtet ndërtimit, organi i akuzës vetëm hesht.

Gazeta ka pritur dy ditë të plota një përgjigje nga Prokuroria e shtetit, për të marrë vesh nëse është iniciuar hetim në këto dy pista dhe përgjigja e vetme ka qenë se kjo çështje serioze ka kohë që ka filluar të trajtohet me një hetim preliminar nga EULEX-i dhe akoma nuk ka ndonjë raport zyrtar për Prokurorinë e shtetit se deri ku kanë shkuar hetimet./kosova sot/