20 vjet Vali Ranch – Jubileu i një vizioni që e shndërroi ëndrrën në simbol të turizmit kosovar

Gjilan – Nga një investim i diasporës në një nga komplekset turistike më të njohura në Kosovë, Vali Ranch feston dy dekada zhvillim, mikpritje dhe besim të fituar me punë. Ka histori suksesi që maten me shifra dhe ka histori që maten me gjurmën që lënë te njerëzit. Historia e Vali Ranch është njëra prej tyre. Në jubileun e 20-vjetorit, kompleksi që mijëra shqiptarë e njohin si “Qyteti i Bardhë” nuk feston vetëm dy dekada aktiviteti, por kremton realizimin e një vizioni që e shndërroi një ëndërr të diasporës në një nga simbolet më të fuqishme të turizmit dhe mikpritjes shqiptare.

Sot, aty ku dikur ishte vetëm një ide e guximshme, ngrihet kompleksi më i madh turistik në Kosovë, një destinacion që çdo ditë mirëpret mijëra vizitorë nga të gjitha trojet shqiptare dhe nga shumë vende të botës. Vali Ranch, investimi i sipërmarrësit Fehmi Fetahi, është bërë shumë më tepër se një resort; është një qytet i ndërtuar për njerëzit, ku ndërthuren natyra, arkitektura, mikpritja dhe tradita shqiptare.

20 vjet vizion që ndryshoi hartën e turizmit në Kosovë

Në një kohë kur shumëkush zgjedh ta ndërtojë të ardhmen larg vendlindjes, Fehmi Fetahi bëri zgjedhjen që e dallon: ta kthejë suksesin e fituar në diasporë në një investim për Kosovën. Me vizion afatgjatë, punë të palodhshme dhe besim në potencialin e vendit, ai e shndërroi Përlepnicën në një qendër zhvillimi ekonomik, punësimi dhe turizmi, duke krijuar një model që sot konsiderohet ndër historitë më të suksesshme të investimeve private në Kosovë.

Në këto 20 vite, Vali Ranch nuk ka ndërtuar vetëm hotele, restorante apo hapësira rekreative. Ka ndërtuar besim, ka krijuar kujtime për mijëra familje, ka hapur qindra vende pune dhe është bërë një pikë takimi për shqiptarët kudo që jetojnë. Pikërisht për këtë arsye, “Qyteti i Bardhë” nuk është vetëm një destinacion turistik – është një simbol i vizionit, i punës dhe i dashurisë për vendlindjen.

Në kohën kur turizmi në Kosovë po njeh zhvillim të vazhdueshëm, Vali Ranch shënon një jubile të rëndësishëm – 20 vjet aktivitet, duke konfirmuar vendin e tij si një nga destinacionet më të vizituara turistike dhe hoteliere në vend.

I themeluar nga sipërmarrësi dhe investitori i diasporës Fehmi Fetahi, kompleksi lindi nga një ëndërr e ndërtuar me punën shumëvjeçare të familjes në Zvicër dhe me bindjen se Kosova meritonte një destinacion modern, ku natyra, mikpritja dhe cilësia të ishin në qendër.

“Kur e kujtoj fillimin, më duket sikur ka qenë dje. Çdo investim ishte fryt i punës sonë shumëvjeçare në Zvicër. Besuam se Kosova meritonte një vend ku familjet të ndiheshin mirë dhe ku mikpritja të ishte vlera kryesore”, shprehet Fetahi.

Sipas tij, suksesi nuk është ndërtuar me reklama, por me besimin e vizitorëve.

“Nuk kam punuar për t’u bërë më i madhi. Kam punuar që çdo mysafir të largohej i kënaqur. Kur njerëzit kthehen përsëri dhe të rekomandojnë te miqtë e tyre, atëherë e kupton se je në rrugën e duhur.”

Gjatë këtyre dy dekadave, Vali Ranch është zgjeruar vazhdimisht duke u shndërruar në një kompleks modern që përfshin Park Hotel, Royal Hill Palace, Quin Vali Palace, Sun Garden, Piazzo Giardino, restorantet Romantika, Daris, Steak House, Rubin, Pavion dhe Leon, si dhe qendrën e kalërimit me kuaj, ambiente për dasma, konferenca, aktivitete rekreative dhe hapësira për të gjithë familjen.

Një pjesë e rëndësishme e historisë së Vali Ranch mbetet diaspora shqiptare, e cila vazhdon ta konsiderojë kompleksin si një adresë të kthimit në vendlindje.

“Diaspora është zemra e Kosovës. Mundohemi që çdo bashkatdhetar të ndihet si në shtëpinë e vet. Besimi që na kanë dhënë ndër vite është përgjegjësia jonë më e madhe”, thekson Fetahi.

Për sipërmarrësin, momentet më të çmuara nuk maten me shifra, por me kujtime.

“Shumë çifte që kanë festuar dasmën e tyre këtu para 15 apo 20 vitesh sot rikthehen me fëmijët e tyre. Ky është suksesi më i madh, sepse do të thotë se kemi qenë pjesë e momenteve më të rëndësishme të jetës së tyre.”

Përveç rolit në zhvillimin e turizmit, Vali Ranch është shndërruar edhe në një faktor të rëndësishëm ekonomik, duke krijuar qindra vende pune dhe duke kontribuar në promovimin e Kosovës si destinacion turistik.

Edhe pas 20 vitesh, investimet nuk ndalen.

“Kemi projekte të reja për ta zgjeruar ofertën dhe për ta bërë Vali Ranch edhe më tërheqës për familjet dhe turistët nga jashtë. Investimi nuk përfundon kurrë”, shprehet Fetahi.

Jubileu i 20-vjetorit nuk është vetëm festë e një biznesi të suksesshëm, por edhe dëshmi se vizioni, puna e palodhshme dhe besimi në vendlindje mund të krijojnë histori suksesi që zgjasin në kohë.

Pas dy dekadash zhvillim, Vali Ranch mbetet një nga simbolet më të njohura të mikpritjes shqiptare dhe një adresë që vazhdon të bashkojë familje, diasporën dhe vizitorë nga mbarë rajoni, duke ndërtuar kujtime që kalojnë nga një brez te tjetri./rajonipress/