Albena Reshitaj takon strukturat e LDK-së në Zvicër, falënderon aktivistët për angazhimin në fushatën zgjedhore

Deputetja e Lidhjes Demokratike të Kosovës (LDK), Albena Reshitaj, ka zhvilluar një vizitë në Zvicër, ku është takuar me drejtuesit dhe aktivistët e strukturave të partisë, në shenjë falënderimi për angazhimin dhe përkushtimin e treguar gjatë fushatës së fundit zgjedhore.

Takimi u mbajt në zyrat e Degës së Parë të LDK-së në Zvicër, ku Reshitaj u prit nga kryetari i degës, Ramadush Emini, së bashku me bashkëpunëtorët, anëtarët e kryesisë dhe aktivistët që, sipas saj, kanë dhënë kontribut të rëndësishëm në organizimin dhe zhvillimin e aktiviteteve politike në mërgatë.

Në këtë takim morën pjesë edhe Zeqir Gjukaj, kryetar i Degës së Dytë të LDK-së në Zvicër, Adem Delija, kryetar i Nëndegës së Dübendorf-it dhe anëtar i kryesisë së Degës së Parë, Agron Sokoli, kryetar i Nëndegës së Aaraut, Robert Ukaj, kandidati i LDK-së nga Zvicra për deputet në zgjedhjet e fundit, si dhe Arben Krasniqi, anëtar i kryesisë së Nëndegës së Oltenit.

Reshitaj theksoi se vizita kishte për qëllim të shprehë mirënjohjen e saj për degët dhe nëndegët e LDK-së në Zvicër, duke vlerësuar punën dhe mbështetjen që ato kanë dhënë gjatë procesit zgjedhor.

Ajo bëri të ditur se gjatë takimit është diskutuar edhe për sfidat me të cilat përballen strukturat e partisë në mërgatë, si dhe për mundësitë e bashkëpunimit dhe të fuqizimit të mëtejshëm të organizimit politik.

“Mërgata jonë ka qenë gjithmonë një forcë e rëndësishme për LDK-në. Besimi po rikthehet dita-ditës më shumë falë njerëzve që punojnë me përkushtim, vullnet dhe dashuri për vendin”, ka deklaruar Reshitaj.

Në fund, ajo falënderoi të gjithë aktivistët, anëtarët dhe bashkatdhetarët për mbështetjen e vazhdueshme, duke theksuar se angazhimi i tyre mbetet motivim për të vazhduar punën me përgjegjësi dhe përkushtim në shërbim të Kosovës dhe mërgatës./rajonipress/