Mos manipuloni me çmime

Safet Gërxhaliu, kryetar i Odës Ekonomike të Kosovës, u ka bërë thirrje të premten komunitetit të biznesit, që pas ndryshimit të normës së TVSH-së, të mos ketë manipulim me çmime të artikujve të ndryshëm. Gërxhaliu po pretendon se ka pasur keqinterpretime lidhur me përmbajtjen e pakos së re fiskale dhe efektet e saj.

Rrjedhimisht, Gërxhaliu tha se me pakon e re fiskale synohet të arrihen efekte të qëndrueshme sociale e humane dhe ekonomiko-strategjike.

Sipas tij, efekti i qëndrueshmërisë sociale e humane do të arrihet me faktin se pasi në Kosovë ekziston një shkallë e lartë e varfërisë ekstreme dhe papunësisë, përmes kësaj politike fiskale, synohet të mbushet më shumë shporta esenciale e konsumatorit.

Ndërsa, lidhur me arritjet e efektit ekonomiko–strategjik, ai tha se viti 2014 është vlerësuar vit i dështimit ekonomik nga i cili është hyrë në vitin e ri me një minus buxhetor, andaj, sipas tij, për shkak të obligimeve të paparashikuara shteti ka nevojë që përmes kësaj pakoje fiskale të arrijë efektin e vet stabilizues./zeri/