Çollaku, i zhgënjyer me BE-në

Bashkimi Evropian duhet të lëvizë përpara me nënshkrimin e MSA-së dhe heqjen e vizave për qytetarët e Kosovës, në të kundërtën kredibiliteti i saj do të humbë tek qytetarët dhe institucionet e Kosovës.

Kështu ka deklaruar ministri i Integrimeve Evropiane, Bekim Çollaku, gjatë një interviste ekskluzive për gazetën “Zëri”, duke shtuar se izolimi i qytetarëve të Kosovës duhet të marrë fund.

“Nuk mund të kërkohet nga Kosova të jetë shoqëri e hapur e në të njëjtën kohë të jetë e izoluar”, shprehet Çollaku për gazetën.

I pari i Ministrisë së Integrimeve Evropiane në Qeverinë e Kosovës thotë se është i habitur nga ngutësia e Komisionit Evropian për ta shpërblyer Serbinë menjëherë për “konstruktivitetin”e saj në dialog me Kosovën.

Përderisa, shprehet tepër i zhgënjyer që BE-ja dështon ta dëshmojë me veprime konkrete se në këtë dialog është edhe një palë tjetër, e cila ka nevojë që të përfitojë shumë më tepër sesa Serbia në agjendën evropiane.

“E them këtë jo për faktin se na pengon avancimi i Serbisë drejt BE-së, mirëpo për faktin se Kosova është akoma pothuajse në pikën zero në kuadër të procesit të integrimit evropian”, shprehet Çollaku.

Gjatë kësaj interviste për gazetën “Zëri”, ministri Çollaku flet për përfitimet e Kosovës nga MSA-ja, migrimin ilegal të kosovarëve drejt BE-së, luftimin e korrupsionit në vend, pjesëmarrjen e qindra kosovarëve në luftën e Sirisë dhe të Irakut, etj./zeri/