Ja sekreti për të shijuar ushqimin e festave pa e tepruar

Festat shoqërohen me tavolina plot me ushqim, aroma që të hapin oreksin dhe atë ndjesinë e ëmbël të të lejuarit të relaksohesh pak. Ushqimi nuk është thjesht një domosdoshmëri. Është shoqëri, ndarje, një moment. E megjithatë, diku midis natës së ndërrimit të viteve dhe darkave familjare, kënaqësia shpesh shndërrohet në një barrë. Sekreti nuk është të privosh veten, por të hash në një mënyrë që të bën të ndihesh mirë më pas.

Kënaqësia nuk matet me sasi

Gabimi më i madh i festave është mendimi “Po ha tani sepse mbaron më vonë”. Kur ha me këtë logjikë, e humbet thelbin. Kënaqësia e vërtetë vjen kur i jep kohë ushqimit. Disa kafshata, përtypja e mirë dhe vëmendja ndaj shijes e bëjnë pjatën më të kënaqshme sesa një porcion i plotë i ngrënë me nxitim.

Mos shkoni në tavolinë plotësisht të uritur

Kur mbërrin i uritur, është pothuajse e sigurt se do të hash më shumë sesa ke nevojë. Një meze e vogël gjatë ditës, si fruta ose kos, e ndihmon trupin tënd të mos veprojë në gjendje paniku. Në këtë mënyrë, në tryezën e festave, mund të bësh zgjedhje më të vetëdijshme se çfarë dhe sa të hash.

Pak nga gjithçka mjafton

Nuk ke pse t’i thuash jo asgjëje. Ajo që bën diferencën janë kombinimet dhe sasitë. Pak nga pjata kryesore, pak nga pjata anësore, një kafshatë nga ëmbëlsira. Kur e mbush pjatën me gjithçka, stomaku lodhet dhe humbet kënaqësia. Kur zgjedh, ha më qetë dhe më këndshëm.

Dëgjo trupin tënd, jo traditën.

Vetëm pse ka ushqim në tavolinë nuk do të thotë që duhet të vazhdosh të hash. Nëse ndihesh i ngopur, mund të ndalosh. Festat nuk prishen sepse ke lënë pak ushqim në pjatë. Përkundrazi, ato prishen kur i kujton me siklet dhe peshë.

Lëvizja dhe relaksimi pas ngrënies

Një shëtitje e lehtë ose një lëvizje e vogël ndihmon tretjen më shumë sesa divani. Edhe ngritja nga tavolina dhe ndërrimi i vendeve bën diferencën. Trupi ka nevojë për ritëm, jo ​​për qetësi.

Besim Murati, golfisti nga Gjilani që po e përfaqëson me dinjitet Kosovën në SHBA

Gjilan – Në arenën sportive ndërkombëtare, ku përfaqësimi i shtetit kërkon talent, disiplinë dhe identitet të fortë kombëtar, emri i Besim Muratit po fiton gjithnjë e më shumë vëmendje. I lindur dhe rritur në Gjilan, Murati sot po e prezanton fuqishëm flamurin e Kosovës në Shtetet e Bashkuara të Amerikës, duke garuar me sukses në sportin e golfit, një disiplinë elitare dhe mjaft konkurruese.

I njohur fillimisht si sportist i karatesë, Besim Murati ka dëshmuar se pasioni për sportin dhe përkushtimi ndaj disiplinës janë vlera që tejkalojnë kufijtë e një fushe të vetme. Sot, në Nju Jork, ai po shënon rezultate mbresëlënëse si golfist, duke u bërë pjesë e garave kombëtare dhe ndërkombëtare, ku përfaqëson jo vetëm veten, por edhe Kosovën.

“Kur e ke flamurin e shtetit tënd në krah, siç është ai i Kosovës, nuk ke asnjë arsye të ndihesh keq. Përkundrazi, kjo më motivon çdo ditë e më shumë që të arrij rezultate dhe ta përfaqësoj Kosovën në mënyrë dinjitoze”, ka deklaruar Murati për rajonipress, duke theksuar rëndësinë emocionale dhe motivuese të përfaqësimit kombëtar.

Sipas tij, një nga garat më prestigjioze ku merr pjesë është “Presidents Cup USA Team vs International Team”, e cila zhvillohet çdo vit në Rye Golf Club at Westchester, New York. Kjo garë, që ka gjashtë vjet që organizohet, ka fituar rëndësi të veçantë në botën e golfit, ndërsa Murati është përzgjedhur të jetë pjesë e ekipit ndërkombëtar për tri vite me radhë.

“International Team deri më tani ka fituar katër kupa, ndërsa USA Team dy. Çdo vit gara bëhet edhe më interesante, por ajo që më motivon më së shumti është fakti se garoj duke mbajtur flamurin e Kosovës, duke përfaqësuar njëkohësisht shtetin tim dhe qytetin tim të bukur, Gjilanin”, shprehet ai.

Murati thekson se golfi është një sport financiarisht i kushtueshëm, por sipas tij, kënaqësia dhe krenaria që vjen nga përfaqësimi i vendit e tejkalojnë çdo vështirësi. Përmes angazhimit dhe përkushtimit të tij, ai po dëshmon se sportistët kosovarë mund të jenë konkurrues edhe në disiplina që tradicionalisht nuk kanë qenë të zhvilluara në vend.

Me paraqitjet e tij në SHBA, Besim Murati po e vendos emrin e Kosovës në hartën e golfit ndërkombëtar, duke u shndërruar në një shembull frymëzues për të rinjtë që synojnë të ndërtojnë karrierë sportive përtej kufijve.