Aktakuzë për krime lufte ndaj Dragan Naskoviq

Gjilan – Prokuroria Speciale e Republikës së Kosovës ka ngritur aktakuzë ndaj D.N., për kryerjen e veprës penale “Krim i luftës kundër popullsisë civile”. I pandehuri D.N. akuzohet se, gjatë periudhës mars-prill të vitit 1999, në cilësinë e komandantit të nënstacionit në Zhegër të Komunës së Gjilanit, nuk ka ndërmarrë asnjë veprim për të parandaluar plaçkitjet, dëbimin dhe vrasjet e 29 e civilëve shqiptarë.

Sipas aktakuzës, D.N ishte në dijeni se më 30 mars 1999, forcat policore dhe ushtarake serbe, nën komandën e tij, kishin rrethuar fshatin Zhegër, ndërsa më 27 mars 1999 ishte sulmuar fshati Llashticë.

I pandehuri D.N., së bashku me komandantin e Statcionit të Policisë në Gjilan, kishin urdhëruar tjetërsimin e vendit të ngjarjes me qëllim të zhdukjes së gjurmëve të krimit.

D.N edhe pse ishte njoftuar përmes një letre nga të dëmtuarit nuk kishte ndërmarrë asnjë veprim për të parandaluar, ndaluar ose për ti paraqitur rastet për hetim, por ishte larguar nga vendi i ngjarjes.

Ndryshe, Dragan Naskoviq – komandant i stacionit policor në Zhegër. Është fajtor për të gjitha rrahjet dhe maltretimet e shqiptarëve të Zhegrës. Bllazha Sava Stojanoviq ish kryetar i partisë Socialiste të Serbisë në Zhegër./rajonipress/