Abazi: Qeverisja Haziri vetëm të këqija i solli Gjilanit

Gjilan – Sahit Abazi shef i grupit të këshilltarëve të PDK-së në një konferencë për media duke folur për rolin e qeverisjes gjashtë mujore dhe punës së Asamblesë tha se qeverisja Haziri shumë të këqija i solli Gjilanit e pak të mira dominuan në këtë kohë. Abazi tha se Lutfi Haziri po e shfrytëzon Gjilanin për nevojat e tij personale duke ofruar këtu njerëz nga Tirana e ministra koti të cilët vetëm shpenzime kanë krijuar për Gjilanin. Gjilani është degraduar në çdo fushë e sektor, por ka edhe të mira në fushën e bujqësisë, administratës e shërbimeve publike tha Abazi.

Sahit Abazi është treguar kritik për punën e qeverisjes Haziri, por edhe realist për sektor të caktuar.

Abazi tha se puna e Kuvendit mund të thuhet e ishte sasiore, por për kah cilësia ka stagnuar sepse nuk janë trajtuar me kohë apo nuk i është dhënë prioritet zgjidhjes së problemeve qytetare. “Në qeverisjen gjashtë mujore kemi një ndryshim të statutit të komunës ku janë shuar drejtoria e kulturës dhe ajo e inspeksionit për çka ne si opozitë me kohë kemi kundërshtuar, derisa kemi reaguar me kohë edhe për gjendjen e rëndë në teatrin e qytetit. Qeverisja Haziri jo që nuk ofroj zgjidhje, por e thellojë dhe më shumë krizën në këtë institucion të kulturës” tha Abazi.

Duke folur për rezultatet konkrete ose ato të parealizuara të qeverisjes Haziri, Abazi tha se e kemi lumin “Mirusha” i cili është shndërruar në një serial pa fund.”Në kohën e PDK-së ka pasur investime në këtë projekt kurse në qeverisjen Haziri gjërat kanë ndryshuar dhe stagnuar. Madje do të jetë e tmerrshme kjo situatë sepse gjendja do të jetë e njëjtë edhe në vitin e ardhshëm”.

Abazi ndërkaq ka kritikuar gjendjen edhe në fushën e ndërtimit. “Jemi e vetmja komunë në Kosovë ku mund të ndërtosh si të duash dhe ku të duash. Nuk kemi asnjë rrënim apo ndërtim ilegal që nga ardhja e LDK-së në pushtet. Ndërtimet pa leje janë denoncuar nga ana e PDK-së vazhdimisht, kurse gjendja mbetet e rënduar edhe në fushën e deponive të egra të cilat po e shëmtojnë Gjilanin. Edhe lumi në Livoq është bërë i padurueshëm për banorët e asaj pjese”.

Abazi tha se është e pakuptimtë që edhe pas dy vitesh qeverisja të mos jetë e kompletuar, meqë ende po vazhdon loja me drejtorët duke e shndërruar qeverisjen në joserioze.

Abazi akuzoj Lutfi Hazirin se po thërret ministra në Gjilan duke krijuar përshtypjen se po realizohen projekte e investime. “Në fakt po krijohet një mashtrim optik në sytë e qytetarëve sepse ende nga kjo qeverisje nuk kemi ndonjë investim apo projekt serioz që e kanë filluar vet”.

Duke folur për raportet e auditorit Abazi tha se ato Gjilanin e radhisin si qeverisje me probleme.

Ndërkaq dukë folur për grupin e këshilltarëve të PDK-së tha se grupi është munduar të jetë aktiv, alternativ dhe denoncues. “Kemi diskutuar e debatuar në të gjitha debatet dhe kemi iniciuar shumë probleme qytetare” tha Abazi.

Shefi i PDK-së ndërkaq duke folur për premtimet e Hazirit tha se ato ende nuk po zbatohen. “Në Gjilan jeta e njerëzve po vështirësohet dhe në njëfarë mënyre më shumë kemi të këqija e pak të mira nga kjo qeverisje. Depresioni ekonomik është dyfishuar në kohën e Lutës sepse bizneset po falimentojnë kurse Gjilani po stërmbushet me jabanxhi. Luta po e shfrytëzon Gjilanin për nevojat e bizneset e tija personale duke sjellur Ilir Metën në Gjilan i cili fare nuk është interes për Gjilanin me përjashtim që janë shpenzuar mijëra euro për pritjen e tij”.

Por Abazi në fund foli edhe për të mirat e qeverisjes Haziri. “Duhet të jemi vetëkritik sepse ka edhe punë të mira. Jemi të kënaqur me drejtorinë e bujqësisë, shërbimeve publike deri diku edhe me administratën “ tha Abazi./rajonipress/