Kur shteti të vret!

Nga Gëzim Mekuli – Kush është vrasësi i Astrit Deharit? Kush e ndihmoj vrasjen e Astritit? Përse u mundësua vdekja e tij? Ku ishte shteti?

Kush është krimineli këtu? Kush është ai që na e vrau Astritin, birin e Shqipërisë, djalin e nënës! Birin e Babit! Kush e vrau vëllanë e motrës?

Është shteti! Është sistemi juridik e politik i Kosovës, ai që na e vodhi studentin e mjekësisë, guximtarin, heroin dhe intelektualin tonë, Astrit Dehari.

Askush tjetër nuk e pushkatoj Astritin, pos shtetit të çoroditur e të kriminalizuar të Kosovës. Askush tjetër! Askush, askush, askush…

A është e mundur kjo? Si bëhet kjo, që atje, ku t’i duhet të jesh më se i sigurt, i vrojtuar, i ndihmuar dhe i kontrolluar, t’i të mos kontrollohesh, të mos sigurohesh, të mos shërohesh, e të “harrohesh”?

Ku ishe, o shtet?

Krimineli e terroristi norvegjez, Anders Breivik, në mes të Oslos, bombardoi ndërtesën e qeverisë dhe vrau 77 civil të pafajshëm në verën e vitit 2011. Ai është në burg. Ai po trajtohet si njeri. Ai po studion. Atij shteti po i dhuron jetë, po e risocializon, po e shëron e po e ndihmon. Këndë po e ndihmon shteti norvegjez? Terroristin që vrau me bombë e me kallashnikovë fëmijë, nxënës, demokraci e qytetari.

Pushtetarë, a jeni n’mend ore? Pse kjo papërgjegjësi? Përse kjo tragjedi, o shtet? A ka ministri ky shtet? A ka nderë, moral e përgjegjësi kjo qeveri? A ka gazetari?A ka mjekësi? Pafundësisht, pyetje, pyetje, pyetje dhe vetëm pyetje… pa përgjigje.

U vra në shtëpinë e juaj, o të pabesë! U vra në pabesi! E vratë intelektualin, mjekun… Po pse nuk e pengove vdekjen, o shtet?

Mediat e sëmura të pushtetit, po thonë se, ai gëlltiti medikamente. Çfarë gazetarie?! Çfarë gazetarie hulumtuese? Kuku, kuku, kuku për ne, e kuku për ata…. Po si lejohen medikamentet në burg? A ka polici ky shtet? A ka sistem juridik? Gjyqësia ku është? Për kënd po e ushqen këtë polici ky pushtet? Kundër popullit, kundër ty e mua? Ja, ky është shteti ynë. Shteti që po na vret!