“Beau Biden”, përjetësisht i Kosovës

Nga e mërkura rruga 35 kilometërshe afër kampit “Bondsteel” do ta bartë emrin e djalit të ndjerë të nënpresidentit amerikan Joe Biden, Beau Biden, i cili ka shërbyer pas luftës në Kosovë.

Në ceremoninë e përurimit të kësaj rruge ka marrë pjesë edhe zëvendëspresidenti i SHBA-ve, Joe Biden, si dhe pjesëtarë të tjerë të kësaj familjeje.

Zëvendëspresidenti amerikan, Joe Biden, është shprehur i kënaqur me emërtimin e kësaj rruge “Beau Biden”.

“Ky është një momenti i ëmbël, por edhe i hidhur, pasi po këtu në këtë vend isha me Beau-n para disa viteve… Beau ishte shumë i kujdesshëm dhe kur erdhi këtu u pat dashuruar me këtë vend, ashtu siç u pata dashuruar unë. Më kujtohet kur u pata kthyer në shtëpi dhe i pata treguar Jillit se çfarë vendi i mirë ishte këtu”, ka thënë Biden, shkruan sot gazeta “Zëri”.

Nënpresidenti i SHBA-së në emër të familjes së tij ka falënderuar Kosovën për këtë gjest.

“Në emër të familjes time, ju jemi mirënjohës dhe jemi shumë të prekur me këtë gjest. E kam vizituar shumë herë këtë rajon kur kam qenë senator. Vizita ime e parë ka qenë në mesin e viteve 70-ta, e dyta si zëvendëspresident në Kosovë. Këto vizita kanë qenë sepse kam besuar shumë në prosperitetin e këtij vendi”, ka deklaruar Biden.

Kurse, presidenti i Kosovës, Hashim Thaçi, ka thënë se djali i Joe Biden, Beau Biden, ka qenë njëri nga amerikanët që i ka shërbyer me zell Kosovës. Thaçi ka thënë se Beau Biden i ka dhënë Kosovës kohë të çmuar të jetës së vet të shkurtër./zeri/